იუსტიციის მინისტრი, რატი ბრეგაძე აცხადებს, რომ მოხარული იქნებიან, თუ სააკაშვილი შიმშილობას შეწყვეტს, ოღონდ, დათქმების გარეშე.

"ევროპულმა სასამართლომ მოუწოდა ბატონ სააკაშვილს, შეეწყვიტა შიმშილობა. ძალიან მოხარულები ვიქნებით, თუ ის, რა თქმა უნდა, დათანხმდება, ოღონდ, რა თქმა უნდა, ყოველგვარი დათქმების გარეშე. რატომ უნდა იყოს გადაყვანილი ეს ადამიანი კერძო კლინიკაში? შეუძლია ვინმეს, რომ ახსნას?

თუკი ადამიანი ასრულებს შიმშილობას და ეს ძალიან კარგია, ჩვენ ამას მივესალმებით და მე ეს დღესაც მრავალგზის დავადასტურე, რომ ჩვენი სულისკვეთება სტრასბურგის სასამართლოს გადაწყვეტილებასთან არის აბსოლუტურად ერთიანი. ჩვენც, რა თქმა უნდა, ძალიან მოხარული ვიქნებით, თუ მისი ჯანმრთელობის მდგომარეობა იქნება სტაბილური და ის დაუბრუნდება ცხოვრების ნორმალურ რიტმს. ამ შემთხვევაში, როდესაც იქნება შესაბამისი პირობები შექმნილი, ის იქნება გადაყვანილი უკან სპეციალური პენიტენციური სამსახურის მე-12 დაწესებულებაში, სადაც აქამდე იხდიდა სასჯელს", — განაცხადა მან რუსთავი 2-ის ეთერში.

ჟურნალისტის კითხვას, თუ მინისტრი აქამდე ამბობდა, რომ სააკაშვილი ფაფებს იღებს, მაშინ რატომ ამბობს ახლა, რომ მან შიმშილობა უნდა შეწყვიტოს, ბრეგაძე ასე პასუხობს:

"მე არასოდეს მითქვამს არცერთ ეთერში ტერმინი შიმშილობის შეწყვეტა. მე ვთქვი და პასუხისმგებელი ვარ ჩემს მიერ წარმოთქმულ ყველა სიტყვაზე და ეს იყო შემდეგი: ის ღებულობს ნატურალურ წვენებს და სხვადასხვა სახის ფაფებს".

ის იმეორებს, რომ ამ ინფორმაციის გავრცელება სადეპუტატო კითხვის გამო მოუწია.

"ამ პასუხში არ ყოფილა საუბარი იმაზე, შიმშილობა შეყწდა, თუ არ შეწყდა. ამ ტერმინზე ჩვენ არ გვქონია აპელირება. რა თქმა უნდა, ოპონენტებმა, რომლებმაც შეიძლება, შიმშილობის ფორმების შესახებ არც კი იციან საერთოდ, აიტაცეს ტერმინი, თითქოს მე განვაცხადე, რომ ამ ადამიანმა შეწყვიტა შიმშილობა", — განაცხადა მან.

რატი ბრეგაძის განცხადების შემდეგ, მმართველი გუნდის წევრებმა არაერთხელ განაცხადეს, რომ სააკაშვილის შიმშილობა "ფეიკი" იყო.

სააკაშვილის განცხადებით, მისი შიმშილობა უკვე გახდა რუსეთისა და მოქმედი ხელისუფლების ბრძოლის იარაღი არა მის, არამედ ქვეყნის საწინააღმდეგოდ. მისივე თქმით, ამ გარემოებების გათვალისწინებით, როგორც კი გადაიყვანენ სათანადო დაწესებულებაში, შიმშილობას შეწყვეტს. თუმცა ის უარზეა გადავიდეს გორის სამხედრო ჰოსპიტალი.