პარლამენტში მოშიმშილე 9 დეპუტატმა შიმშილობა შეწყვიტა. მათი თქმით, მას შემდეგ რაც ექსპრეზიდენტი გორის ჰოსპიტალში გადაყვანას დათანხმდა, მთავარი სანერვიულო, რაც მათ ჰქონდათ, ამ ეტაპისთვის სასიკეთოდ გადაწყდა.

"მინდა გითხრათ, რომ პოლიტიკური ბრძოლის ამ ეტაპზე ეს არის წარმატება, რომელიც მოიტანა იმ პრინციპულობამ, შემართებამ, შეუპოვრობამ, რაც მთელმა საზოგადოებამ, მთელმა საქართველომ გამოიჩინა", — განაცხადა აკო მინაშვილმა.

დეპუტატებმა შიმშილობა 14 ნოემბერს დაიწყეს და სააკაშვილის კლინიკაში გადაყვანას ითხოვდნენ.

ექსპრეზიდენტი მიხეილ სააკაშვილი გორის ჰოსპიტალში გადასვლაზე თანახმაა და შიმშილობას შეწყვეტს მას შემდეგ, რაც კლინიკაში განათავსებენ. ადვოკატ ნიკა გვარამიას თქმით, სააკაშვილს ჰოსპიტალში დღეს გადაიყვანენ და ხვალიდან უკვე მნიშვნელოვანია ზუსტად დადგინდეს მისი სამედიცინო დღის წესრიგი.

გვარამიამ მოუწოდა ციხესთან შეკრებილებს, რომ დატოვონ ტერიტორია, რადგან რეანომობილი იქამდე არ გამოვა ციხიდან, სანამ ადგილზე ხალხმრავლობა იქნება. რაც შეეხება გადაყვანისას ადვოკატების დასწრებას, მისი თქმით, რეანიმობილში ჯდომას ვერ მოითხოვენ, რადგან ეს შეუძლებელია, თუმცა პირადი ექიმი და დედა დარჩებიან მასთან გადაყვანამდე, რის შემდეგაც წავლენ გორში.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

დღეს, 19 ნოემბერს კი იუსტიციის სამინისტრომ მას გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშლობას შეწყვეტს.