არასამთავრობო ორგანიზაციები შეშფოთებას გამოთქვამენ ხელისუფლების წარმომადგენელთა მხრიდან სახალხო დამცველის მიმართ გახშირებული თავდასხმების გამო და მოუწოდებენ, რომ შეწყვიტონ. მათი განცხადებით, ხელისუფლებამ უნდა შექმნას ყველა პირობა კონსტიტუციური ორგანოს შეუფერხებელი საქმიანობისთვის.

"ხელმომწერი ორგანიზაციები უკიდურეს შეშფოთებას გამოვთქვამთ, ხელისუფლების წარმომადგენელთა მხრიდან საქართველოს სახალხო დამცველის მიმართ გახშირებული თავდასხმების გამო. სახალხო დამცველი წარმოადგენს ერთადერთ დამოუკიდებელ კონსტიტუციურ ინსტიტუტს, რომელსაც სახელმწიფო მიტაცების პირობებში მმართველი პარტია ვერ აკონტროლებს", — წერია განცხადებაში.

განცხადებაში ორგანიზაციამ მკაცრად გააკრიტიკა კობახიძის განცხადება. მათ ხელისუფლებას კიდევ ერთხელ შეახსენეს სახალხო დამცველის ორგანოს უფლებები და მოვალეობა და აღნიშნეს, რომ კობახიძის განცხადება შესაძლოა, კანონმდებლობით დასჯადი ქმედების ნიშნებსაც კი შეიცავდეს.

"ხაზგასმით უნდა აღინიშნოს, რომ საქართველოს სახალხო დამცველი კონსტიტუციური ორგანოა, რომელსაც ქვეყანაში ადამიანის უფლებების დაცვის მონიტორინგი და ზედამხედველობა ევალება. შესაბამისად, მესამე პრეზიდენტის ჯანმრთელობის მონიტორინგი, ისევე როგორც, გამოვლენილი დარღვევების თაობაზე საზოგადოებისა თუ საერთაშორისო თანამეგობრობის ინფორმირება, სახალხო დამცველის პირდაპირი ვალდებულებაა. შესაბამისად, სახალხო დამცველის საქმიანობა ვერანაირად ვერ გახდება მისთვის პასუხისმგებლობის დაკისრების საფუძველი და ირაკლი კობახიძის განცხადების მიზანი ამ ინსტიტუტის საქმიანობის ხელშეშლა და მასზე ნეგატიური ზემოქმედების მცდელობა იყო. მეტიც, აღნიშნული განცხადება სცდება სამართლებრივ ჩარჩოებს, წარმოადგენს უხეშ ჩარევას სახალხო დამცველის საქმიანობაში და, შესაძლოა, კანონმდებლობით დასჯადი ქმედების ნიშნებსაც კი შეიცავდეს" — ვკითხულობთ განცხადებაში.

განცხადებას ხელს აწერენ:

• საერთაშორისო გამჭვირვალობა — საქართველო;

• სამართლიანი არჩევნებისა და დემოკრატიის საერთაშორისო საზოგადოება;

• ღია საზოგადოების ფონდი;

• საქართველოს დემოკრატიული ინიციატივა;

• ეკონომიკური პოლიტიკის კვლევის ცენტრი;

• კვლევითი ჟურნალისტიკისა და ეკონომიკური ანალიზის ცენტრი;

• საფარი;

• საზოგადოება და ბანკები;

• მწვანე ალტერნატივა;

• საქართველოს რეფორმების ასოციაცია;

• მედიის განვითარების ფონდი;

• მსოფლიო გამოცდილება საქართველოსთვის.

სახალხო დამცველის შექმნილი ექიმების ჯგუფის დასკვნის შემდეგ, სადაც ეწერა, რომ ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია დიდი გამოცდილების მქონე პოლიპროფილურ ჰოსპიტალში, ქართული ოცნების წევრებმა, ომბუდსმენისა და ამ ჯგუფის კრიტიკა დაიწყეს. მეტიც, მმართველი გუნდის თავმჯდომარემ მუქარისშემცველი განცხადება გაავრცელა და თქვა, რომ თუ ეს "ფეიკ" დასკვნა მიხეილ სააკაშვილის სამოქალაქო კლინიკაში გადაყვანის საფუძველი გახდება და ამას მოყვება ის სცენარი, "რომლისაც ეშინიათ", შესაძლოა, როგორც სახალხო დამცველის, ასევე, კონკრეტული ექიმების პასუხისმგებლობის საკითხი დადგეს. პასუხად ომბუდსმენმა განაცხადა, რომ კობახიძის რიტორიკა სცილდება სამართლებრივ ჩარჩოს და არის დაშინების მცდელობა.

ომბუდსმენი გააკრიტიკეს ქართული ოცნების სხვა წევრებმაც, ბექა დავითულიანმა განაცხადა, რო ლომჯარია პოლიტიკურ პროცესში "ცოტა სხვა მხარეს" არის გადახრილი. სოზარ სუბარის განცხადებით, კი გაოცებულია იმ ფაქტით, რომ ლომჯარიამ პატიმრობაში მყოფი მესამე პრეზიდენტი იმაზე მეტჯერ ინახულა, ვიდრე ყველა სხვა პატიმარი ოთხი წლის განმავლობაში.

ამავე თემაზე:

• სახალხო დამცველზე თავდასხმის ან მუქარის მცდელობები მიუღებელია — დეგნანი
• ომბუდსმენზე თავდასხმა მიუღებელია, ხელისუფლებამ პატივი უნდა სცეს ამ ინსტიტუტს — Amnesty International
• კობახიძის განცხადება ექიმებზე ზეწოლის უპრეცედენტო ფაქტია — სამედიცინო ასოციაციების გაერთიანება
• თუ სააკაშვილს რამე დაემართება, პასუხისმგებლობა დადგება მათი, ვინც ექიმების დასკვნა არ გაითვალისწინა — ბაქრაძე
• კორძაიას შეფასებით, სახალხო დამცველზე მუქარა ყველანაირ ზღვარს სცილდება