მოკლედ: ირაკლი კობახიძე აცხადებს, რომ ევროპარლამენტის რეზოლუციაში ვიზალიბერალიზაციაზე ჩანაწერს, "ზუსტად ისეთივე ჩალის ფასი აქვს, როგორიც ლგბტ პროპაგანდის არდაშვებასა და სააკაშვილის გათავისუფლების თაობაზე ჩანაწერებს".

  • ამის შესახებ პრემიერ-მინისტრმა დღეს, 26 აპრილს, ჟურნალისტებს განუცხადა.

დეტალები: კობახიძემ აღნიშნა, რომ რეზოლუციას, რომელიც ეხება ბიძინა ივანიშვილის "დასჯას", არავითარი ფასი არ აქვს.

  • "მეგობრის თხოვნა, რომელიც ეხება გაუმჭვირვალობას, ანუ მთავარი ევროპული ღირებულების არ უზრუნველყოფას ჩვენს ქვეყანაში, თხოვნას, რომელიც უკავშირდება ლგბტ პროპაგანდისთვის მწვანე შუქის ანთებას, სააკაშვილის გათავისუფლებას, თხოვნას, რომელიც უკავშირდება ბიძინა ივანიშვილის დასჯას, რა თქმა უნდა, არავითარი ფასი არ აქვს", — თქვა კობახიძემ.

კონტექსტი: გუშინ, 25 აპრილს, ევროპარლამენტმა მიიღო რეზოლუცია საქართველოში უცხოეთის გავლენის გამჭვირვალობის კანონპროექტთან დაკავშირებით.

  • ევროპარლამენტი მოუწოდებს ევროკომისიას, შეაფასოს კანონის გავლენა საქართველოს მიერ ვიზალიბერალიზაციის კრიტერიუმების შესრულებაზე, განსაკუთრებით, ფუნდამენტური უფლებების ნაწილში.
  • რეზოლუციაში ნათქვამია, რომ ევროკავშირში გაწევრიანების მოლაპარაკებები საქართველოსთან არ უნდა გაიხსნას მანამ, სანამ ეს კანონი საქართველოს სამართლებრივი წესრიგის ნაწილია.

გარდა ამისა, სანქციები უნდა დაუწესდეს ბიძინა ივანიშვილს, რომელიც "ცდილობს, ძირი გამოუთხაროს ქვეყნის დასავლურ კურსს რუსეთისკენ გადახრის სასარგებლოდ".

  • ევროპარლამენტი კიდევ ერთხელ მოუწოდებს საქართველოს ხელისუფლებას, პატიმრობიდან გაათავისუფლონ ექსპრეზიდენტი მიხეილ სააკაშვილი და მისცენ მას საზღვარგარეთ მკურნალობის საშუალება.

გაიგე მეტი: სანქციები ივანიშვილს და უვიზო რეჟიმის პუნქტების გადახედვა — ევროპარლამენტმა საქართველოზე რეზოლუცია შესწორებებით მიიღო