მოკლედ: მოძრაობა სირცხვილია ჯგუფ Massive Attack-ს, რომლის კონცერტი ბლექ სი არენაზე ივლისში არის დაგეგმილი, ქართველი ხალხის სახელით, მიმართავს, კონცერტამდე ქვეყანაში არსებულ "საგანგაშო პოლიტიკური კონტექსტს" გაეცნონ.

დეტალები: მიმართვაში წერია, რომ "ამჟამად ქართული სამოქალაქო საზოგადოება, დამოუკიდებელი მედია, მოწყვლადი სოციალური ჯგუფები, LGBTQ თემი, ქალები, ეთნიკური, რელიგიური და სხვა უმცირესობები ხელისუფლების მხრიდან მასობრივი თავდასხმის ქვეშ არიან".

  • ასევე, წერენ "ოლიგარქიულ კონტროლზე" და იმაზე, რომ ხელისუფლებაზე "დიდი გავლენა აქვს რუსეთის ტერორისტულ რეჟიმს".
  • მიმართვაში აღნიშნულია ევროპარლამენტის რეზოლუციის შესახებაც, რომელიც მხარს უჭერს სანქციებს ბიძინა ივანიშვილის მიმართ.
  • ამასთან, განცხადებაში ვკითხულობთ ანტიდემოკრატიულ კანონებზეც — რუსულ კანონზე, საკონსტიტუციო ცვლილებაზე, ლგბტ პროპაგანდის წინააღმდეგ და ოფშორების კანონზე.
  • საუბარია მშვიდობიანი დემონსტრაციების დარბევაზეც.

"საკონცერტო დარბაზს, რომელშიც თქვენი კონცერტი უნდა გაიმართოს, Black Sea Arena ჰქვია. შენობა ივანიშვილმა ააშენა და ამჟამად სახელმწიფო ბალანსზეა. მასზე წვდომა მხოლოდ ხელისუფლებას აქვს. არსებობს საფრთხე, რომ თქვენი პერფორმანსი ქართულმა ოცნებამ წინასაარჩევნო კამპანიისთვის გამოიყენოს და ამით მნიშვნელოვანი საკითხების გადაფარვა სცადოს.

  • ვიცით, რომ ჯგუფი Massive Attack სამართლიანობის, გამოხატვის თავისუფლების, სამოქალაქო აქტივიზმისა და უმცირესობათა უფლებების მხარდამჭერია. ამიტომ, გთხოვთ, გაეცნოთ საქართველოში არსებულ საგანგაშო პოლიტიკურ ვითარებას. ვიმედოვნებთ, რომ გაითვალისწინებთ ამ საკითხს და თქვენი განსჯის საფუძველზე, საპასუხო ნაბიჯს გადადგამთ. სულ მცირე, ვიმედოვნებთ, რომ ამ ანტიდემოკრატიული ქმედებების წინააღმდეგ სცენიდან თქვენს პოზიციას დააფიქსირებთ.
  • გვჯერა, რომ გამოიყენებთ თქვენს პლატფორმას, რათა მხარი დაუჭიროთ საქართველოს მოქალაქეებს თავისუფლებისა და დემოკრატიული მომავლისთვის ბრძოლაში", — წერია მიმართვაში.

ბოლო ხაზი: Massive Attack საქართველოში მთავრობის მხარდაჭერილი კამპანიის, Starring Georgia-ს ფარგლებში ჩამოდის.

  • კონცერტი 28 ივლისს არის დაგეგმილი.