მოკლედ: თბილისის სახელმწიფო უნივერსიტეტის სტუდენტი ზვიად ცეცხლაძე, რომელიც პრემიერ-მინისტრ ირაკლი კობახიძის ლექციაზე საქართველოსა და ევროკავშირის დროშით მივიდა, ლექციაზე არ შეუშვეს.

დეტალები: ზვიად ცეცხლაძე ამბობს, რომ ის, ფაქტობრივად, აუდიტორიასთანაც არ მიუშვეს, მიზეზად კი დროშების ქონა დაუსახელეს.

  • "ირაკლი კობახიძის ლექცია იყო, მე ვარ მისი სტუდენტი. პირველ კურსზე ვარ. აქამდეც ვყოფილვარ [ლექციაზე] დროშებით. შეიძლება, ასე მობმული არ მქონდა, მაგრამ დროშების ელემენტები დამქონდა. უბრალოდ, ვაპირებდი [დროშით] ჯდომას, მეტი რაღა უნდა მექნა, ყველაფერი გაპროტესტებულია", — თქვა ცეცხლაძემ.

მთავარი არხი წერს, რომ ირაკლი კობახიძე თსუ-ში დაცვის თანხლებით მივიდა და რუსული კანონის მოწინააღმდეგე ახალგაზრდის პროტესტი, სავარაუდოდ, არც კი შეუმჩნევია.

  • კითხვაზე თუ რატომ არ შეუშვეს სტუდენტი ლექციაზე, კობახიძემ უპასუხა, რომ "უნივერსიტეტი არ არის TV პირველის, მთავარის და ნაციონალური მოძრაობის ადგილი".

კონტექსტი: ბოლო რამდენიმე დღეა, რაც საქართველოში ხალხი რუსული კანონის მიღებას აპროტესტებს, საკანონმდებლო ინიციატივის საპარლამენტო განხილვების პარალელურად.

  • აქციები არა მხოლოდ თბილისში, სხვა რეგიონებშიც იმართება.

რუსული კანონის საწინააღმდეგო აქციებში აქტიურად არიან ჩართულები ახალგაზრდებიც.

  • ახალგაზრდების ორგანიზებით აქციები გაიმართა 18 და 19 აპრილსაც.

მსგავსი: დღეს, 20 აპრილს, 5 საათზე, გაიმართება ქალების მარში — ქალები ვირჩევთ ევროპას