ქართველი პიანისტი გიორგი გიგაშვილი ევროპის საკონცერტო დარბაზების ორგანიზაციის (ECHO) ცნობილი პროგრამის, ამომავალი ვარსკვლავების, გამარჯვებულია. გიგაშვილის თქმით, იგი 2025-2026 წლის სეზონისთვის შერჩეულ 5 არტისტს შორისაა. ქართველი მუსიკოსი დორტმუნდის საკონცერტო დარბაზმა, კატოვიცეს პოლონური რადიოს ეროვნულმა სიმფონიურმა ორკესტრმა, კელნისა და ლუქსემბურგის ფილარმონიებმა წარადგინეს.

ევროპის საკონცერტო დარბაზების ორგანიზაცია 1991 წელს, ევროკავშირის მხარდაჭერით დაფუძნდა. მისი ერთ-ერთი მისია ახალგაზრდა არტისტების მხარდაჭერაა. სწორედ ამ მიზნით, 1995 წელს შეიქმნა ამომავალი ვარსკვლავების პროგრამა, რომლის საშუალებითაც ახალგაზრდა მუსიკოსები საერთაშორისო აუდიტორიას ეცნობიან. პროგრამაში ჩართული 22 ევროპული საკონცერტო დარბაზის თანამშრომლობით, სხვადასხვა ქვეყნიდან შერჩეულ ხელოვანებს ტურნეს გამართვის შესაძლებლობა ეძლევათ.

ECHO-ის წევრებს შორისაა ვენის, სტოკჰოლმის, ლონდონის, პარიზის, ამსტერდამის, ბრიუსელის და სხვა ევროპული ქალაქების საკონცერტო დარბაზები.

ტურნეს გამართვასთან ერთად, ამომავალი ვარსკვლავების პროგრამა ახალგაზრდა მუსიკოსებს სასწავლო შეხვედრებში, ვორქშოპებსა და მასტერკლასებში მონაწილეობას სთავაზობს. ამასთან, საგანგებოდ მონაწილეებისთვის ცნობილი კომპოზიტორები ახალ ნაწარმოებებსაც წერენ. გასულ სეზონებზე, ამომავალი ვარსკვლავებისთვის მუსიკა დაწერეს ისეთმა აღიარებულმა კომპოზიტორებმა, როგორებიც არიან მისატო მოჩიძუკი, ვოლფგანგ რიმი და იოჰანა დოდერერი.

აღსანიშნავია, რომ 2011-2012 წლის სეზონზე ამომავალი ვარსკვლავების მონაწილე იყო ხატია ბუნიათიშვილიც.