მოკლედ: რუსული კანონის მეორე მოსმენა პარლამენტის იურიდიულ საკითხთა კომიტეტში ორშაბათს, 29 აპრილს გაიმართება.

დეტალები: კომიტეტის სხდომა დილის 9 საათზეა ჩანიშნული.

  • სხდომაზე 4 საკითხს განიხილავენ, მათ შორის ერთ-ერთი სწორედ რუსული კანონია.
  • ამავე დღეს, 15 საათზე, ბიუროს სხდომაც არის ჩანიშნული.
  • ამის შემდეგ კი კანონის მეორე მოსმენით პლენარულ სხდომაზე გავა, თუმცა სხდომის თარიღი, ჯერჯერობით, ცნობილი არ არის.

პარალელურად, 29 აპრილს, ქართული ოცნების მიერ ორგანიზებული, რუსული კანონის საწინააღმდეგო აქციის კონტრაქცია იგეგმება.


პროცედურულად: ზოგადად, კანონპროექტის მისაღებად საჭიროა დეპუტატების სამი მოსმენით მხარდაჭერა პლენარულ სხდომაზე.

  • ერთი მოსმენით კანონპროექტი უკვე მიღებულია.
  • რუსული კანონის საბოლოო, მესამე მოსმენით მხარდაჭერის თარიღად 17 მაისია განსაზღვრული.
  • კანონი, მიღების შემთხვევაში, პრეზიდენტს გადაეგზავნება.
  • პრეზიდენტმა თქვა, რომ კანონს ვეტოს დაადებს.
  • თუმცა, ამის შემდეგ, საპარლამენტო უმრავლესობა ვეტოს დაძლევას შეეცდება, მას დასაძლევად საკმარისი მანდატი აქვს.