აშშ-ის ელჩი კელი დეგნანი აცხადებს, რომ სახალხო დამცველზე მუქარა და თავდასხმის მცდელობები მიუღებელია. მისი თქმით, ომბუდსმენი, გუნდთან ერთად დიდი ზეწოლის ქვეშ მნიშვნელოვან საქმეს აკეთებს და კრიტიკის ნაცვლად, ის იმსახურებს აღიარებასა და პატივისცემას.

"მცდელობები, რომ თავს დაესხან თუ დაემუქრონ სახალხო დამცველს მიუღებელია, რადგან სახალხო დამცველი და მისი გუნდი აკეთებს ზუსტად იმას, რის უფლებასაც აძლევს მათ საქართველოს კონსტიტუცია. ისინი საქართველოს ყველა მოქალაქის უფლებების დამცველები არიან და აკეთებენ აღსანიშნავ საქმეს ძალიან დიდი ზეწოლის ქვეშ, რათა წარადგინონ ზუსტი და ობიექტური ინფორმაცია, რაც საქართველოს მოქალაქეებს სჭირდებათ და რისი სერიოზული ნაკლებობაცაა.

სახალხო დამცველი საკუთარ მოვალეობას ასრულებს პროფესიონალურად და მიუკერძოებლად და ამავდროულად შთამბეჭდავად. ამიტომაც ჩვენ გვჯერა იმის, რასაც მისი გუნდი წარადგენს და მათ ანგარიშებს შესაძლოა ენდონ საქართველოს მოქალაქეები, რადგან ეს ობიექტური და ზუსტი ინფორმაციაა. სახალხო დამცველი იმსახურებს დიდ მხარდაჭერას და როგორც აქამდე ვახსენე, ის იმსახურებს პატივისცემასა და აღიარებას და არა კრიტიკას", — განაცხადა მან.

სახალხო დამცველის შექმნილი ექიმების ჯგუფის დასკვნის შემდეგ, სადაც ეწერა, რომ ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია დიდი გამოცდილების მქონე პოლიპროფილურ ჰოსპიტალში, ქართული ოცნების წევრებმა, ომბუდსმენისა და ამ ჯგუფის კრიტიკა დაიწყეს. მეტიც, მმართველი გუნდის თავმჯდომარემ მუქარისშემცველი განცხადება გაავრცელა და თქვა, რომ თუ ეს "ფეიკ" დასკვნა მიხეილ სააკაშვილის სამოქალაქო კლინიკაში გადაყვანის საფუძველი გახდება და ამას მოყვება ის სცენარი, "რომლისაც ეშინიათ", შესაძლოა, როგორც სახალხო დამცველის, ასევე, კონკრეტული ექიმების პასუხისმგებლობის საკითხი დადგეს. პასუხად ომბუდსმენმა განაცხადა, რომ კობახიძის რიტორიკა სცილდება სამართლებრივ ჩარჩოს და არის დაშინების მცდელობა.

ომბუდსმენი გააკრიტიკეს ქართული ოცნების სხვა წევრებმაც, ბექა დავითულიანმა განაცხადა, რო ლომჯარია პოლიტიკურ პროცესში "ცოტა სხვა მხარეს" არის გადახრილი. სოზარ სუბარის განცხადებით, კი გაოცებულია იმ ფაქტით, რომ ლომჯარიამ პატიმრობაში მყოფი მესამე პრეზიდენტი იმაზე მეტჯერ ინახულა, ვიდრე ყველა სხვა პატიმარი ოთხი წლის განმავლობაში.

ეს პირველი შემთხვევა არ არის, როდესაც ქართული ოცნების წევრები სახალხო დამცველს თავს ესხმიან და პარტიულობასა და მიკერძოებულობაში ადანაშაულებენ მათდამი კრიტიკული განცხადებების გამო. ამ მხრივ ყველაზე მეტად კობახიძე გამოირჩეოდა, რომელმაც 25 ოქტომბერს განაცხადა, რომ ლომჯარია ნაციონალური მოძრაობის "ერთ-ერთ რიგით აქტივისტად აქციეს".

ამავე თემაზე: