მოკლედ: ძალადობრივი და პრორუსული კონსერვატიული მოძრაობა/ ალტ-ინფოს ერთ-ერთი ლიდერი ზურა მახარაძე, ფეისბუქზე წერს, რომ საჯარო რეესტრმა მათი ახალი პარტიის, ქართული იდეის გაუქმების პროცესი დაიწყო.

დეტალები: მახარაძის თქმით, ცენტრალური საარჩევნო კომისიისგან მიიღო წერილი, რომლის მიხედვით, საჯარო რეესტრში შევიდა ანტიკორუფციული ბიუროს მიმართვა, რომელიც ეხება პარტია ქართული იდეის რეგისტრირებული მონაცემების კანონმდებლობასთან შესაბამისობის მოკვლევას:

  • ცესკო წერს, რომ "ვიდრე არ დადგინდება პარტიის რეგისტრირებული მონაცემების კანონმდებლობასთან შესაბამისობა", საარჩევნო რეგისტრაციის პროცედურების განხილვას აჩერებს.

წინაისტორია: საჯარო რეესტრმა ძალადობრივი და პრორუსული პარტია კონსერვატიული მოძრაობა 8 აპრილს გააუქმა.

  • რეესტრის ეროვნული სააგენტოს გადაწყვეტილებაში ნათქვამია, რომ წარმოება დაიწყეს ანტიკორუფციული ბიუროს მოთხოვნის საფუძველზე, შეესწავლათ პარტიის რეგისტრაციის კანონიერება.
  • მანამდე ცნობილი იყო, რომ 2024 წლის არჩევნებში რეგისტრაციის მიზნით, კონსერვატიული მოძრაობა/ალტ ინფომ ცესკოს 50 608 ხელმოწერა წარუდგინა 2024 წლის 3 აპრილს.

13 აპრილს ალტ-ინფომ ქართული ოცნების ოფისთან აქცია გამართა.

  • ისინი აპროტესტებენ საჯარო რეესტრის გადაწყვეტილებას.
  • აქციაზე შეკრებილებმა პარტია ქართული ოცნების დროშები დაწვეს.

აქციაზე ზურა მახარაძემ განაცხადა, რომ ლევან ჩაჩუამ, პარტია ქართული იდეის თავმჯდომარემ, მათ პარტია აჩუქა.

  • "ბატონმა ლევან ჩაჩუამ და მისმა თანამებრძოლებმა მოგვცეს, გვაჩუქეს თავისი პარტია. ამ პარტიას წინა არჩევნებში მონაწილეობა აქვს მიღებული", — განაცხადა ზურა მახარაძემ.