ყარაჩაი-ჩერქეზეთში შეიარაღებულმა ჯგუფმა, თავდასხმის შედეგად, 2 პოლიციელი მოკლა, ერთი კი დაჭრა.

შემთხვევა კვირის დასაწყისში მოხდა.

რუსეთის შინაგან საქმეთა სამინისტრომ განაცხადა, რომ უცნობი შეიარაღებული პირების ჯგუფმა, პოლიციის მანქანაზე თავდასხმისას, მოკლა ოფიცრები — მურატ კალახანოვი და რომან გუშჩინი. ერთი ოფიცერი კი, რომლის ვინაობაც უცნობია, დაშავდა და საავადმყოფოში გადაიყვანეს.

გავრცელებული ინფორმაციით, ხუთმა ეჭვმიტანილმა პოლიციელებს სამსახურებრივი იარაღი და საბრძოლო მასალა მიითვისა, ისინი ჯერ კიდევ არ დაუკავებიათ.

ხუთ ეჭვმიტანილზე ფედერალური ძებნა გამოცხადდა, მას შემდეგ, რაც თავდამსხმელების მიერ გამოყენებული ავტომობილი იდენტიფიცირდა. სისხლის სამართლის საქმე, ასევე, აღიძრა ძალოვანი უწყების თანამშრომლების სიცოცხლის მოსპობის მცდელობის, იარაღისა და საბრძოლო მასალის უკანონო ტარება-შენახვის, ცეცხლსასროლი იარაღის და საბრძოლო მასალის ქურდობის ბრალდებით.

ორშაბათს დილით ყარაჩაი-ჩერქეზეთის ხელმძღვანელმა რაშიდ თემზეროვმა განაცხადა, რომ სამართალდამცავი ორგანოები მუშაობენ თავდასხმაზე პასუხისმგებელი პირების იდენტიფიცირებასა და დაკავებისთვის.

ტელეგრამ არხმა BAZA, რომელიც ჩრდილოეთ კავკასიის ამბებს აშუქებს, იმავე დღეს გამოაქვეყნა ორი ადამიანის ფოტო, რომლებიც, სავარაუდოდ, თავდასხმაში არიან ეჭვმიტანილები.

ერთი დღის შემდეგ კი ყარაჩაი-ჩერქეზეთის შინაგან საქმეთა სამინისტრომ გამოაქვეყნა ხუთი ეჭვმიტანილის სახელები და ფოტოები, მათ შორის, BAZA-ს მიერ ამოცნობილი ორი პირიდან ერთ-ერთი. ეჭვმიტანილები 27-35 წლის მამაკაცები არიან. შსს მოუწოდებს მოსახლეობას, თუკი აქვთ ინფორმაცია მათი ადგილსამყოფლის შესახებ, დაუკავშირდნენ საგამოძიებო სამსახურს.

მანქანა, რომლითაც ეჭვმიტანილები გაიქცნენ, ოთხშაბათს იპოვეს,თუმცა თავდამსხმელები კვლავ თავისუფლები არიან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.