ყოფილი სახალხო დამცველი უჩა ნანუაშვილი აცხადებს, რომ უკრაინის ომბუდსმენის ციხეში არშეშვებით საქართველოს ხელისუფლება იზიარებს იმ პრაქტიკას, რომელიც რუსეთშია დამკვიდრებული. მისივე თქმით, პენიტენციური სისტემა იხურება ყველა დამოუკიდებელი, ნეიტრალური დამკვირვებლისთვის, იქედან გამომდინარე, რომ ხელისუფლება უკმაყოფილოა იმ განცხადებებით, რომელიც ლუდმილა დენისოვამ პირველი ვიზიტის შემდეგ გააკეთა.

"ეს ნამდვილად ჰგავს რუსეთის პრაქტიკას. ის პრაქტიკა, რომელიც გამოიყენება რუსეთში და სხვა მსგავს დიქტატორულ ქვეყნებში, როდესაც არ უშვებენ დამოუკიდებელ, ნეიტრალურ უფლებადამცველს, შეიძლება ითქვას, რომ უფლებაშელახულ მოქალაქეებთან", — განუცხადა მან ფორმულას.

უკრაინის სახალხო დამცველი ლუდმილა დენისოვა უკრაინის მოქალაქისა და საქართველოს ექსპრეზიდენტ მიხეილ სააკაშვილის სანახავად ციხეში არ შეუშვეს. იუსტიციის მინისტრმა, რატი ბრეგაძემ ეს იმით ახსნა, რომ გლდანის #18 დაწესებულება სამკურნალოა და თავს იკავებენ შეუშვან ის ადამიანები, ვისაც საქართველოს კანონმდებლობით ამის უფლება არ აქვს.

დენისოვას შეხვედრა სურს თავად იუსტიციის მინისტრთანაც. ამაზე ბრეგაძე ამბობს, რომ რომ სჯობდა დენისოვას შეხვედრა მაშინ ეთხოვა, როცა პირველად ჩამოვიდა და ცალმხრივი განცხადება გააკეთა.

უკრაინის სახალხო დამცველი საქართველოში პირველად 27 ოქტომბერს ჩამოვიდა. მან განაცხადა, რომ საზღვარზე 40 წუთით შეაყოვნეს და იქამდე არ შემოუშვეს, სანამ რამდენიმე პირთან არ დარეკა. ციხეში შესვლის შემდეგ დენისოვამ აღნიშნა, რომ დააფიქსირა სააკაშვილის არაერთი უფლების დარღვევა რის შესახებაც აცნობებდა, საქართველოს იუსტიციის მინისტრს, უკრაინის პრეზიდენტს, უკრაინაში ევროპული ქვეყნების საელჩოებსა და ევროპარლამენტარებს. მმართველ გუნდში მისი განცხადებები გააკრიტიკეს — ექსომბუდსმენმა, სოზარ სუბარმა განაცხადა, რომ დენისოვას შეფასებები დიპლომატიურობის და ყველაფრის საზღვრებს სცილდება.

5 ნოემბერს დენისოვამ განცხადება გაავრცელა, სადაც დაგმო სააკაშვილის უფლებების დარღვევა და საერთაშორისო თანამეგობრობას დაუყოვნებლივი რეაგირებისკენ მოუწოდა. 11 ნოემბერს კი განაცხადა, რომ გლდანის ციხის კლინიკაში სააკაშვილის მოთავსების ვიდეო წამებისა და არასათანადო მოპყრობის ფაქტს ადასტურებს.