უნგრეთში, შაბათს, 28 ივნისს 100 000-მა ადამიანმა მთავრობის აკრძალვა და პოლიციის ბრძანებები დაარღვია. ორგანიზატორების თქმით, ეს გამოსვლა უნგრეთის ისტორიაში ყველაზე დიდი LGBTQ+ Pride ღონისძიება იყო. ეს ყველაფერი ქვეყნის პრემიერმინისტრ ვიქტორ ორბანის მთავრობის საჯარო პროტესტის ნიშნად მოეწყო. ამის შესახებ ინფორმაციას AP ავრცელებს.

მარტში ვიქტორ ორბანის მემარჯვენე-პოპულისტურმა პარტიამ პრაიდი აკრძალა. თუმცა, მოქალაქეები მაინც რისკავდნენ, რათა ბუდაპეშტის პრაიდის 30-ე ყოველწლიურ მსვლელობაში მონაწილეობა მიეღოთ. მიუხედავად იმისა, რომ მათ შეიძლება ჰქონოდათ პოლიციასთან დაპირისპირებისა და დაჰკისრებოდათ დიდი ოდენობით ჯარიმები.

მსვლელობა ბუდაპეშტის მერიის შენობიდან დაიწყო, ქალაქის ცენტრში გაიარა და ერჟებეტის ხიდზე დუნაის მდინარე გადაკვეთა. პოლიციამ მარშრუტი შეცვალა, რათა მსვლელობა მემარჯვენე რადიკალთა მცირე ჯგუფისგან დაეცვა.

მსვლელობის მასშტაბები ორბანისთვის სერიოზული დარტყმად იქნა აღქმული. მისი რეიტინგი ეცემა, მაშინ როცა ახალი ოპოზიციური ძალა სოციოლოგიურ გამოკითხვებში ლიდერობს.

ორბანი და მისი პარტია ამტკიცებენ, რომ პრაიდი ბავშვების ზნეობრივი განვითარების უფლებებს არღვევს — რაც ახლად მიღებულმა საკონსტიტუციო ცვლილებამ სხვა ფუნდამენტურ უფლებებზე, მათ შორის მშვიდობიანი შეკრების უფლებაზე, მაღლა დააყენა.

მარტში დაჩქარებული წესით მიღებულმა კანონმა დანაშაულად ცნო 18 წლამდე პირებისთვის იმ ღონისძიებების გამართვა ან დასწრება, რომლებიც "აჩვენებენ ან პოპულარიზაციას უწევენ" ჰომოსექსუალობას. ორბანმა ღიად განაცხადა, რომ კანონის სამიზნე სწორედ ბუდაპეშტის პრაიდია.

ხელისუფლებამ ქალაქის ცენტრში დამატებითი ვიდეოკამერები დაამონტაჟა და გავრცელებული ინფორმაციით, სახის ამოცნობის ტექნოლოგიას მონაწილეთა იდენტიფიცირებისთვის იყენებდა. ახალი კანონის მიხედვით, პრაიდზე დასწრებას შეიძლება 200 000 უნგრული ფორინტის (დაახლოებით 586 აშშ დოლარი) ოდენობის ჯარიმა მოჰყვეს.

ეს აკრძალვა ორბანის მთავრობის მიერ LGBTQ+ უფლებებზე განხორციელებული უახლესი თავდასხმაა. მის მმართველობაში უკვე აკრძალულია ერთსქესიანთა ქორწინება, მათთვის შვილის აყვანა და ტრანსგენდერებისათვის სქესის ცვლილება ოფიციალურ დოკუმენტებში.

ბოლო კვირებში პოლიციამ არაერთხელ უარყო ორგანიზატორების თხოვნა მსვლელობის რეგისტრაციაზე. თუმცა ბუდაპეშტის მერმა გერგეი კარაჩონიმ მხარი დაუჭირა ორგანიზატორებს და განაცხადა, რომ პრაიდი მუნიციპალიტეტის ღონისძიებად ჩატარდებოდა — რაც, მისი თქმით, პოლიციის ნებართვას არ საჭიროებს.

მიუხედავად ამისა, მთავრობის პოზიცია უცვლელი დარჩა: პრაიდის ჩატარება, თუნდაც ქალაქის მხარდაჭერით, არალეგალურია. ამ კვირაში იუსტიციის მინისტრმა კარაჩონი გააფრთხილა, რომ პრაიდის ორგანიზება ან მისი პოპულარიზაცია შეიძლება ერთწლიანი პატიმრობით დაისაჯოს.

ბევრმა მონაწილემ აღნიშნა, რომ პრაიდზე გამოსვლა არ ეხებოდა მხოლოდ სექსუალური უმცირესობების უფლებებს — არამედ ქვეყნის დემოკრატიულ მომავალს.