შაბათს თეირანში უამრავი ადამიანი შეიკრიბა ამ თვის დასაწყისში ისრაელის თავდასხმების შედეგად დაღუპული მაღალი რანგის სამხედრო პირების, ბირთვული მეცნიერების, ასევე ქალებისა და ბავშვების სახელმწიფო დაკრძალვის ცერემონიაზე. დამსწრეები, რომელთა უმეტესობა მთლიანად შავებში იყო ჩაცმული, სკანდირებდნენ "სიკვდილს ისრაელსა და ამერიკას."

შავებში შემოსილები მიჰყვებოდნენ სატვირთოებს, რომლებშიც კუბოები ეწყო. ბევრი ადამიანი ცდილობდა ხელით შეხებოდა კუბოებს, რადგან ეს მათთვის პატივისცემის გამოხატვის ნიშანია.

ხალხის ნაკადი სკანდირებდა სლოგანებს ისრაელის, ამერიკის შეერთებული შტატების, ისრაელის პრემიერმინისტრ ბენიამინ ნეთანიაჰუსა და აშშ-ს პრეზიდენტ დონალდ ტრამპის წინააღმდეგ.

"კეთილშობილო ლიდერო, ჩვენ მზად ვართ",— ამგვარად აჩვენებდნენ ისინი ირანის უზენაეს ლიდერს, აიათოლა ალი ხამენეის მხარდაჭერას.

CNN-ის მიხედვით, ხალხის მასაში მყოფმა ერთმა კაცმა თქვა: "ჩემი მესიჯი ტრამპისთვის არის ის, რომ ღვთის ნებით თქვენ მოკვდებით! თქვენ შეუტიეთ ირანს და ხალხი მალე შურს იძიებს."

ირანის სახელმწიფო მედია იუწყება, რომ ისრაელის საჰაერო შეტევების შედეგად 60 ადამიანი დაიღუპა, რომელთა შორისაც იყვნენ ირანის ყველაზე ძლიერი სამხედრო ლიდერები: ჰოსეინ სალამი — ისლამური რევოლუციის გუშაგთა კორპუსის (IRGC) ყოფილი მეთაური, მოჰამად ბაგერი — ირანის შეიარაღებული ძალების შტაბის ყოფილი უფროსი, ამირ ალი ჰაჯიზადე — IRGC-ის საჰაერო ძალების ყოფილი მეთაური.