ქართული ოცნების დეპუტატი და ყოფილი სახალხო დამცველი სოზარ სუბარი ფიქრობს, რომ უკრაინის ომბუდსმენის განცხადებები ყველანაირი დიპლომატიურობის საზღვრებს სცილდება. მისი აზრით, უცხო ქვეყნის ომბუდსმენი თავს ამის უფლებას არ უნდა აძლევდეს.

"ის, რომ, აი, ეს ადამიანი იყო შეშვებული ციხეში, ეს იყო კეთილი ნება ნამდვილად, ქართული სახელმწიფოსი. ის, რაც მან განცხადებები გააკეთა, იყო გამაოგნებელი, პირადად, ჩემთვის იმიტომ, რომ ომბუდსმენი ასეთ უფლებებს თავს არ უნდა აძლევდეს. ის იყო ჩვეულებრივი ქართველი პოლიტიკოსი რა განცხადებასაც გააკეთებს, ისეთი განცხადებაა.

მსგავსი განცხადება რომ გააკეთოს საქართველოს სახალხო დამცველმა, შეიძლება დავეთანხმოთ, შეიძლება არ დავეთანხმოთ, მაგრამ მას ამის უფლება აქვს, მაგრამ როცა უცხო ქვეყნის ომბუდსმენი ამის უფლებას აძლევს თავს, აი, მართლა სცილდება ყველანაირ დიპლომატიურობის და ყველაფრის საზღვრებს. არ აქვს მას ამის უფლება", — განაცხადა სუბარმა რუსთავი 2-ის ეთერში.

ის განმარტავს, რომ ომბუდსმენის უფლებამოსილება მკაფიოდ ჩამოყალიბებულ ტერიტორიაზე ვრცელდება და ქვეყნის საზღვრებს მიღმა სახალხო დამცველებს არ აქვთ უფლებები.

"ომბუდსმენი ექსტერიტორიული პრინციპით არ მოქმედებს. მისი უფლებამოსილება ძალიან მკაფიოდ ჩამოყალიბებულ ტერიტორიაზე, ანუ იმ ქვეყანაში მოქმედებს მხოლოდ, სადაც მას აქვს უფლებამოსილება. საქართველოს ომბუდსმენი იცავს საქართველოს ტერიტორიაზე ნებისმიერი იმ ადამიანის უფლებას, ვინც აქ მოხვდება, იქნება მოქალაქე თუ იქნება მოქალაქეობის არმქონე პირი თუ სხვა ქვეყნის მოქალაქე. აი, იგივე უკრაინა, იგივე გერმანია და ნებისმიერი სხვა ტერიტორიის მიღმა მათ არა აქვთ უფლებები", — აცხადებს სოზარ სუბარი.

უკრაინის სახალხო დამცველი ლუდმილა დენისოვა მიხეილ სააკაშვილს 27 ოქტომბერს შეხვდა. ციხიდან გამოსვლის შემდეგ მან განაცხადა, რომ დააფიქსირა ექსპრეზიდენტის უფლებების დარღვევები, რის შესახებაც აცნობებს საქართველოს იუსტიციის მინისტრს, უკრაინის პრეზიდენტს, უკრაინაში ევროპული ქვეყნების საელჩოებსა და ევროპარლამენტარებს. მანვე განაცხადა, რომ მიმართავს იუსტიციის სამინისტროს, რათა საჭიროების შემთხვევაში ექსპრეზიდენტი მიხეილ სააკაშვილი კლინიკა ვივამედში გადაიყვანონ.

გარდა ამისა, დენისოვამ ისაუბრა იმაზეც, რომ ქვეყანაში შემოსვლისას პრობლემები შეუქმნეს. კერძოდ, დაკითხეს და რამდენიმე ზარი დასჭირდა იმისთვის, რომ შემოსულიყო.