პარტია გახარია საქართველოსთვის ლიდერი, გიორგი გახარია გერმანიაში სოციალ-დემოკრატიული პარტიის კონგრესს ესწრება. ამის შესახებ ინფორმაციას გიორგი გახარია საკუთარ სოციალურ სელში ავრცელებს.

მისი თქმით, ის კონგრესზე ბუნდესტაგის ევროპულ საქმეთა კომიტეტის თავმჯდომარის მოადგილეს, იოჰანეს შრაპსს შეხვდა და მასთან "ქართული ოცნების მიერ ოპოზიციური ლიდერების პოლიტიკურად მოტივირებული დევნა" განიხილა..

"გერმანიაში ვესწრები გერმანიის სოციალ-დემოკრატიული (SPD) პარტიის კონგრესს, რომელიც იმართება საქართველოში მზარდი ავტორიტარიზმის კრიზისის ფონზე. მქონდა შესაძლებლობა, შევხვედროდი კოლეგებს, მათ შორის ბუნდესთაგის ევროპულ საქმეთა კომიტეტის თავმჯდომარის მოადგილეს, იოჰანეს შრაპსს.

განვიხილეთ ქართული ოცნების მიერ ოპოზიციური ლიდერების პოლიტიკურად მოტივირებული დევნა, დამოუკიდებელ მედიასა და სამოქალაქო საზოგადოებაზე ზეწოლა, პოლიტიკური პატიმრების გათავისუფლების სასწრაფო აუცილებლობა, აგრეთვე პარტია საქართველოსთვის — გეგმები გახდეს ევროპის სოციალისტური პარტიის (PES) ოჯახის წევრი, რისი განხილვაც შემოდგომაზე იგეგმება.

მადლიერები ვართ ჩვენი გერმანელი პარტნიორების, მტკიცე მხარდაჭერისთვის," — დაწერა გიორგი გახარიამ.

შეგახსენებთ, რომ გახარია საქართველოსთვის ლიდერი, ყოფილი პრემიერი და შინაგან საქმეთა მინისტრი გიორგი გახარია ოცნების პარლამენტის დროებით საგამოძიებო კომისიაზე 23 ივნისს მეორედ დაიბარეს. საქართველოში არყოფნის გამო, მან წულუკიანის კომისიას ონლაინ-რეჟიმში მონაწილეობა შესთავაზა, რაზეც უარი მიიღო. წულუკიანის თქმით, გიორგი გახარია კომისიაზე 2 ივლისსაა დაბარებული.