გერმანიის ელჩი პეტერ ფიშერი ოცნების ხელისუფლების პარლამენტის თავმჯდომარის შალვა პაპუაშვილის განცხადებას X-ზე ეხმაურება. ის წერს, რომ მოშიმშილე პოლიტიკოსების მიმართ თანაგრძნობის გამოხატულება ადამიანური ემპათიაა.

"ადამიანური თანაგრძნობის გამოხატულებაა, რომ მოშიმშილე პოლიტიკოსებთან ელენე ხოშტარიასთან და ქართული ოცნების ყოფილ წევრ გედევან ფოფხაძესთან მიხვიდე. "თუ ჩვენთან არ ხარ, მტერი ხარ" — ასეთი ატმოსფეროს პოპულარიზაცია ხდება. ეს მენტალიტეტი დემოკრატიის ეწინააღმდეგება და "ევროკავშირი 2030 წლისთვის" ილუზიად აქცევს", — წერს პეტერ ფიშერი.

პეტერ ფიშერი რუსთაველის გამზირზე მოშიმშილე პოლიტიკოსების — კოალიცია ცვლილებების ერთ-ერთ ლიდერის, ელენე ხოშტარიასა და გედევან ფოფხაძის მოსანახულებლად პარლამენტთან გუშინ, 28 ივნისს მივიდა. რის შემდეგაც შალვა პაპუაშვილმა X-ზე დაწერა, რომ "ყველა, ვინც მოშიმშილესთან მიდის და თვითდაზიანების შეწყვეტას არ ურჩევს, თვითმკვლელობის ხელშემწყობია!". მისი თქმით "ეს გერმანელებსაც ეხება".

შეხსენებისთვის, ელენე ხოშტარიამ შიმშილობა 27 ივნისს საღამოს გამოაცხადა, 28 ივნისს მას გედევან ფოფხაძეც შეუერთდა. მათთან ერთად კიდევ 3 აქტივისტი — ვასილ ელიავა, გიორგი სტეპანოვი და ბაჩო კუცია.