ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი, 29 ივნისს სომხეთში ჩავიდა, სადაც სომხეთის პრეზიდენტს, ვაჰან ხაჩატურიანს, შეხვდა.

"მიხარია, რომ ვარ სომხეთში და შევხვდი პრეზიდენტ ხაჩატურიანს.

ვიმსჯელეთ ევროკავშირ-სომხეთს შორის ურთიერთობების გაღრმავებაზე, ევროკავშირის მხარდაჭერაზე რეფორმების პროცესში და გამძლეობისა და კეთილდღეობის განმტკიცებაზე.

ძალიან მნიშვნელოვანია რეგიონის მშვიდობისა და სტაბილურობის უზრუნველყოფა," – წერს კალასი X-ზე.

ევროკავშირის ვებგვერდზე გამოქვეყნებული ინფორმაციის თანახმად, ვიზიტის ფარგლებში კალასს ჩანიშნული აქვს შეხვედრები სომხეთის საგარეო საქმეთა მინისტრ არარატ მირზოიანთან და პრემიერმინისტრ ნიკოლ ფაშინიანთან შეხვედრა.

ასევე დაგეგმილია შეხვედრები ახალგაზრდული და სამოქალაქო საზოგადოების წარმომადგენლებთან, მათ შორის Erasmus+ პროგრამის კურსდამთავრებულებთან და ახალგაზრდა ელჩებთან.

კაია კალასი ასევე ეწვევა ევროკავშირის მისიის შტაბს ქალაქ ეღეგნაძორში.

სომხეთის პარლამენტმა 25 მარტს ევროკავშირში გაწევრიანების პროცესის დაწყების კანონპროექტი საბოლოოდ მიიღო. სომხეთს ევროკავშირის წევრობის კანდიდატის სტატუსი არ აქვს მოპოვებული. კანდიდატის სტატუსისთვის საჭიროა რეფორმების გატარება და სომხეთის კანონმდებლობის ევროკავშირის კანონმდებლობასთან დაახლოება.