უკრაინის პრეზიდენტმა ვოლოდიმირ ზელენსკიმ სოციალურ ქსელ X-ზე გამოაქვეყნა განცხადება ღამის მასიურ თავდასხმასთან დაკავშირებით. როგორც პრეზიდენტმა აღნიშნა, უკრაინის ცაზე იყო 477 დრონი და 60 სხვადასხვა ტიპის რაკეტა, მათ შორის რუსულ-ირანული "შაჰედები".

მისი თქმით, რუსეთის სამიზნე ისევ მშვიდობიანი მოსახლეობა გახდა — სმილაში საცხოვრებელ კორპუსს დაეცა რაკეტა, დაშავდა ბავშვი.

ზელენსკიმ ასევე დაადასტურა, რომ თავდასხმის მოგერიებისას დაიღუპა F-16-ის პილოტი მაქსიმ უსტიმენკო, რომელმაც ერთ დღეში 7 საჰაერო სამიზნე გაანადგურა.

პრეზიდენტის თქმით, მოსკოვი არ გაჩერდება და უკრაინას სჭირდება საჰაერო თავდაცვის სისტემების გაძლიერება, მათ შორის ამერიკული სისტემების შეძენა.

ზელენსკიმ საერთაშორისო პარტნიორებს მოუწოდა, გაძლიერდეს მხარდაჭერა უკრაინისთვის.

"მთელი ღამის განმავლობაში უკრაინის ტერიტორიაზე საჰაერო განგაშის სიგნალები ისმოდა — ჩვენს ცაზე დაფრინავდა 477 დრონი, უმეტესობა რუსულ-ირანული "შაჰედები", ასევე 60 სხვადასხვა ტიპის რაკეტა. რუსები ესხმოდნენ ყველაფერს, რაც სიცოცხლის შენარჩუნებას უზრუნველყოფს. შეტევა სმილას ერთ-ერთ საცხოვრებელ კორპუსზეც განხორციელდა, დაშავდა ბავშვი. სამაშველო სამსახურები იმყოფებიან იქ, სადაც მათი დახმარება საჭიროა.

სამწუხაროდ, თავდასხმის მოგერიებისას დაიღუპა ჩვენი F-16-ის პილოტი მაქსიმ უსტიმენკო. დღეს მან გაანადგურა 7 საჰაერო სამიზნე. ვუსამძიმრებ მის ოჯახს და თანამებრძოლებს. გავეცი დავალება, სრულად იქნას გამოძიებული მისი დაღუპვის გარემოებები. უკრაინული ავიაცია გმირულად იცავს ჩვენს ცას. მადლიერი ვარ ყველა მებრძოლის, ვინც იცავს უკრაინას.

მოსკოვი არ გაჩერდება, სანამ მას აქვს საშუალება განახორციელოს მასიური თავდასხმები. მხოლოდ ამ კვირაში განხორციელდა 114-ზე მეტი სარაკეტო თავდასხმა, 1 270-ზე მეტი დრონი და თითქმის 1 100 პლანირებადი ბომბი. პუტინმა დიდი ხანია მიიღო გადაწყვეტილება, რომ ომს გააგრძელებს, მიუხედავად მსოფლიოს მოწოდებებისა მშვიდობისკენ. ეს ომი უნდა დასრულდეს – ამისთვის საჭიროა ზეწოლა აგრესორზე და თავდაცვა. თავდაცვა ბალისტიკური და სხვა ტიპის რაკეტებისგან, დრონებისგან და ტერორისგან. უკრაინას ესაჭიროება საჰაერო თავდაცვის გაძლიერება — ეს საუკეთესო გზაა სიცოცხლის დასაცავად. ეს არის ამერიკული სისტემები, რომლებიც მზად ვართ შევიძინოთ. ჩვენ ვეყრდნობით ლიდერობას, პოლიტიკურ ნებისყოფას და აშშ-ის, ევროპის და ჩვენი ყველა პარტნიორის მხარდაჭერას. მადლობა ყველას, ვინც გვეხმარება", – წერია უკრაინის პრეზიდენტის, ვოლოდიმერ ზელენსკის განცხადებაში.