28 ივნისს, ირანის სახელმწიფო ტელევიზიის ეთერში გამოჩნდა ირანის უზენაესი ლიდერის, აიათოლა ალი ხამენეის მრჩეველი, ალი შამხანი, მას შემდეგ, რაც გავრცელდა ინფორმაცია, რომ ის 13 ივნისის ისრაელის საჰაერო დარტყმის შედეგად დაიღუპა. ამის შესახებ ინფორმაციას CNN ავრცელებს.

შამხანის ბედი საიდუმლოებით მოცული გახდა მას შემდეგ, რაც ისრაელის მიერ 13 ივნისს ირანზე განხორციელებული დარტყმების შემდეგ მისი გარდაცვალების შესახებ ინფორმაცია გავრცელდა.

გასულ პარასკევს, რამდენიმე ირანულმა მედიასაშუალებამ, მათ შორის IRNA-მ, Tasnim-მა და Fars-მა გაავრცელეს ინფორმაცია, რომ შამხანი არ მომკვდარა, "მძიმედ დაშავდა და საავადმყოფოში გადაიყვანეს". თუმცა, მისი ფოტოები არ გამოაქვეყნეს.

გუშინ, 28 ივნისს შამხანი ირანის სახელმწიფო მედიაში ისრაელთან 12-დღიანი ომის დროს დაღუპულთა სახელმწიფო დაკრძალვის ცერემონიალის ფოტოებზე გამოჩნდა.

ჟურნალისტებთან საუბრისას შამხანმა განაცხადა, რომ ისრაელის მიერ მის სახლზე განხორციელებული დარტყმის შემდეგ სამი საათის განმავლობაში ნანგრევების ქვეშ იმყოფებოდა. მისი თქმით, მიუხედავად იმისა, რომ დაშავებული იყო და ნეკნები მოტეხილი ჰქონდა, გადარჩა.

შეგახსენებთ, რომ ისრაელ-ირანის სამხედრო კონფლიქტი 2025 წლის 13 ივნისის გამთენიისას ისრაელის მიერ დაწყებული ფართომასშტაბიანი თავდასხმითი ოპერაციით დაიწყო. სამხედრო კონფლიქტში ამერიკის შეერთებული შტატები ჩაერთო და ირანის მნიშვნელოვან ობიექტებზე შეტევა განახორციელა. 24 ივნისს დაპირისპირება შეჩერდა.

ასევე იხილეთ:

ირანში ისრაელის საჰაერო თავდასხმებისას დაღუპული ოფიციალური პირების დაკრძალვა იმართება

ისრაელი აცხადებს, რომ ირანთან ორმხრივ ცეცხლის შეწყვეტას დათანხმდა