მუსიკალური პროექტი Tamada მსმენელს შავი პრინცის სიმღერის — მე ქუთაისელი ვარ — ახალ ვერსიას სთავაზობს. მუსიკოსის გულშემატკივრებს ეს სიმღერა, შესაძლოა, ლაივ კონცერტებიდან გეცნოთ, ხოლო მათთვის, ვისაც სიმღერის Tamada-სეული ვერსია ჯერ კიდევ არ მოგვისმენია — სტუდიური ვერსიაც შემოგვთავაზა. ახალ სინგლთან დაკავშირებით კომენტარი Tamada-ს ვთხოვეთ:

"შავი პრინცის ეს სიმღერა ბავშვობიდანვე ძალიან მიყვარს და ჩემთვის ძალიან ბევრ, კარგ მოგონებასთან ასოცირდება, ამიტომ შარშან, სპონტანურად, დავიწყე სიმღერის ლაივ კონცერტებზე შესრულება და ძალიან ბევრმა მსმენელმა მთხოვა, რომ მისი სტუდიური ვერსია გამომეშვა", — ამბობს On.ge-სთან მუსიკოსი ლაშა ჩხაპელია.

სიმღერის მოსმენა როგორც იუთუბზე, ასევე Spotify-სა და BandCamp-ს მუსიკალურ პლატფორმებზე არის შესაძლებელი.

მუსიკოსი გვიყვება, რომ 4 ივლისს შავ პრინცს 54 წელი შეუსრულდებოდა და ეს სიმღერა მისი მხრიდან ერთგვარი მიძღვნაა.

"მინდა, რომ ყველა თანხა, რაც სტრიმებით შემოვა, მის ოჯახს გადავცე... არ მინდა, რომ ეს "ქველმოქმედება" იყოს, ეს უბრალოდ ჩემი სურვილი და ერთგვარი საჩუქარია მისი დაბადების დღისთვის", — გვეუბნება მუსიკოსი.

როგორც ლაშა ჩხაპელია განმარტავს, სიმღერა Organic House-სა და შედარებით მშვიდი რეივის სტილშია, თუმცა ძალიან ჰგავს ორიგინალ ვერსიას.

"თვითონ ჟღერადობა ჩემებურად არის გაკეთებული, ვერ გავკადნიერდი, რომ თვითონ რეპი შემესრულებინა, იმიტომ, რომ ყოველი რეპერის სათქმელი ძალიან პირადულია და თვითონ შავი პრინცის სიტყვები მხოლოდ sample-ბად გამოვიყენე", — ამბობს ის.

შეგახსენებთ, რომ Tamada — მუსიკოსი ლაშა ჩხაპელიას, მუსიკალური პროექტია, რომელიც 2019 წელს შეიქმნა და ორ მუსიკოსს, სოლისტ ლაშა ჩხაპელიასა და გიტარისტ ლექსო რატიანს აერთიანებს. Tamada-ს ჩამოყალიბებამდე სოლისტი ბერლინის სხვადასხვა კლუბში უკრავდა და, მოგვიანებით, გადაწყვიტა, რომ ელექტრონული მუსიკა ქართულ ფოლკლორთან ერთად გაეერთიანებინა.

მისმა პირველმა EP-იმ დღის სინათლე 2020 წელს იხილა და მალევე მოიპოვა პოპულარობა.

ლაშას რამდენიმე საინტერესო კოლაბორაცია აქვს დაგეგმილი, მათ შორის მუსიკოს El Búho-სთან.

ვინ არის El Búho ?

რობინ პერკინსი, იგივე ელ ბუჰო — ინგლისელი მუსიკოსია. მისი ჟღერადობა აერთიანებს Dub-ს, IDM-სა და ელექტრონულ მუსიკას, ლათინური ამერიკის ფოლკლორის ელემენტებით.

Tamada გვიყვება, რომ მათ არაერთი კონცერტი აქვთ ერთად ჩატარებული და თითქმის წელიწად-ნახევარია ახალ სიმღერაზე მუშაობენ, რომელიც მალე გამოვა.

"ვგეგმავთ რამდენიმე სინგლის გამოშვებას. ერთ-ერთი სინგლი იქნება სომხურ მოტივებზე, რომელიც არის კომიტასისგან (მე-19 საუკუნეში მცხოვრები მუსიკოსი მღვდელი) არის შთაგონებული, ვფიქრობ, ძალიან კარგი გამოვიდა, მსმენელი მას ივლისის ბოლოსკენ მოისმენს", — ამბობს On.ge-სთან მუსიკოსი ლაშა ჩხაპელია.

ლაშამ ასევე გაგვიზიარა, რომ ის კონცერტებს ზაფხულში, ბათუმში გეგმავს, მოგვიანებით კი ამერიკისა და ევროპის ტურს დაიწყებს.