კოალიცია ცვლილებისთვის ერთ-ერთმა ლიდერმა, ელენე ხოშტარიამ დღეს დაანონსებულ აქციასთან დაკავშირებით ტვ პირველის ჟურნალისტთან საუბრისას კომენტარი გააკეთა და აღნიშნა, რომ მნიშვნელოვანია რუსთაველის გამზირზე რაც შეიძლება მეტი ადამიანი შეიკრიბოს.

"მე აბსოლუტურად გააზრებული მაქვს, მათ შორის, ჩემი ფიზიკური შესაძლებლობები და ამ მხრივ სანერვიულო არაფერი არ არის. ყველაზე მნიშვნელოვანია, რომ ის ბრძოლა, რომელშიც, მათ შორის, მეც ვარ და ის ბრძოლა, რომელშიც არიან ახალგაზრდები — 50ზე მეტი ციხეში. ის ბრძოლა, რომლისთვისაც პოლიტიკოსები არიან ციხეში. ამან ჩვენ ყველა გაგვაძლიეროს, გაგვაერთიანოს და მივიდეთ საბოლოო შედეგამდე [...] პირველი, რაც მინდა ვთქვა, დღეს არის საღამოს 8 საათზე აქცია და ძალიან მნიშვნელოვანია, რომ ვიყოთ ბევრი.მოქალაქეებმა იცოდნენ, რომ ვიბრძვით, არ ვჩერდებით, უკან არ ვიხევთ. მათ შორის, უკიდურესი ფორმებით. ასევე, ოპოზიციური სპექტრი ვიყოთ ერთად ამ ბრძოლაში. დღეს მე ველოდები და მოლოდინი მაქვს, რომ ადამიანები გამოვლენ," — თქვა ელენე ხოშტარიამ.

მან ასევე ისაუბრა იმ მიზეზებზე, რის გამოც, პროტესტის უკიდურეს ფორმას — შიმშილობას მიმართა.

"რაც შეეხება ჩემს მოთხოვნებს, თუ რატომ გადავდგი ეს ნაბიჯი. პირველ რიგში, მე არანაირი მოთხოვნა ქართულ ოცნებასთან არ მაქვს. იმიტომ, რომ ქართული თუ რუსული ოცნება არ არის ძალა, რომელიც ან მორალურ, ან პოლიტიკურ, ან სამართლიან რაიმე კომუნიკაციაში ვინმესთან შევა. ესენი არიან დამთავრებულები. და ესენი ტექნიკურადაც უნდა დამთავრდნენ ამ ქვეყანაში.

ჩემი გადაწყვეტილება იყო ნაკარნახევი სურვილით, რომ ხალხმა დაინახოს, პირველ რიგში, რაც არ უნდა დაჭერების ტალღა იყოს, რაც არ უნდა შეტევების ტალღა იყოს ამ რუსული ოცნებისგან პოლიტიკოსები ვიბრძვით, არ ვტყდებით. ნაწილი ციხეშია, მე ამ უკიდურეს ფორმებს მივმართავ, ამიტომ მოქმედების აზრი უნდა დაინახოს ყველამ. უნდა ნახონ, რომ მოქმედებენ არა მხოლოდ მოქალაქეები, არამედ მოქმედებენ,მათ შორის, პოლიტიკოსები.

მეორე, ძალიან მნიშვნელოვანი ჩემთვის არის, რომ მივაღწიოთ რუსთაველზე ძალიან სწრაფად პროდასავლური, ერთიანი ძალების ერთობას და მოქმედებას. გადავიდეთ მოქმედების აქტიურ ფაზაში. ეს აქტიური ფაზა, ჩემი აზრით, არის ნულოვანი თანამშრომლობა და ოთხი ოქტომბრის არჩევნების დელეგიტიმაცია. ამის გზებზე ჩვენ ვმსჯელობთ, ვიმსჯელებთ. ჩემი სურვილია, რომ ამ ყველაფერზე შევჯერდეთ.

ეს არის ცემი ამ ფორმით განაცხადი. მე ვიცი, რომ ძალიან ბევრი ადამიანის სიტყვა გაიცვითა. პოლიტიკოსების სიტყვებიც გაიცვითა. მათ შორის მიტომ, რომ ნამდვილად ესმოდეთ, რომ ეს არის არა უბრალოდ პოლიტიკური ლაპარაკი, არამედ მართლა მყარი გადაწყვეტილება, რომ ჩვენ შედეგს მივაღწიოთ და ვიბრძოლოთ, სწორედ ამიტომ მივმართე ამ უკიდურეს ფორმას," — აღნიშნა ელენე ხოშტარიამ.

შეხსენებისთვის, ელენე ხოშტარიამ შიმშილობა 27 ივნისს საღამოს გამოაცხადა, 28 ივნისს მას გედევან ფოფხაძეც შეუერთდა. მათთან ერთად კიდევ 3 აქტივისტი — ვასილ ელიავა, გიორგი სტეპანოვი და ბაჩო კუცია.

ასევე იხილეთ: