უკრაინა ტოვებს ოტავის საერთაშორისო კონვენციას, რომელიც ქვეითსაწინააღმდეგო ნაღმების გამოყენებას კრძალავს, რაც ომის განმავლობაში თავდაცვითი შესაძლებლობების გაზრდას ემსახურება.

უკრაინის პრეზიდენტმა ვოლოდიმირ ზელენსკიმ ხელი მოაწერა ბრძანებას, რომელიც ოტავის კონვენციიდან გამოსვლას ითვალისწინებს. ამის შესახებ პარლამენტის წევრმა, რომან კოსტენკომ განაცხადა.

მისი თქმით, ეს გადაწყვეტილება ომის "რეალობიდან" გამომდინარე მიღებული აუცილებელი ნაბიჯია.

"რუსეთი თავად არ არის ამ კონვენციის წევრი და აქტიურად იყენებს ნაღმებს, როგორც სამხედროების, ისე მშვიდობიანი მოსახლეობის წინააღმდეგ. ასეთ პირობებში, უკრაინა ვეღარ დარჩება შეზღუდული," — აღნიშნა კოსტენკომ.

დოკუმენტი ჯერ ოფიციალურად არ გამოქვეყნებულა პრეზიდენტის ადმინისტრაციის ვებგვერდზე.

ოტავის კონვენცია 1997 წლის 18 სექტემბერს ოსლოში იქნა მიღებული და 1999 წლიდან ამოქმედდა. მას, დღევანდელი მონაცემებით, 160-ზე მეტი ქვეყანა შეუერთდა, თუმცა ისეთი სახელმწიფოები, როგორიცაა რუსეთი, აშშ, ჩინეთი, ინდოეთი და პაკისტანი, შეთანხმების მონაწილე არ არიან.

უკრაინამ კონვენცია 1999 წლის თებერვალში ნიუ იორკში გააფორმა და 2005 წლის 18 მაისს უკრაინის რადამ დაამტკიცა. ხელმოწერის დროს უკრაინა მსოფლიოში ნაღმების რაოდენობით მეხუთე ადგილზე იყო. კონვენციის მონაწილეები იღებენ ვალდებულებას, რომ არასდროს გამოიყენონ ქვეითსაწინააღმდეგო ნაღმები, ასევე არ განავითარონ, არ დაამზადონ, არ შეიძინონ, არ შეინახონ ან არ გადასცენ ისინი პირდაპირ ან შუამავლების მეშვეობით.

RBC- Ukraine-ზე დაყრდნობით, 26 ივნისს პოლონეთის სეიმმა მხარი დაუჭირა კანონპროექტს ოტავას კონვენციიდან გასვლის შესახებ, რომელიც კრძალავს ქვეითსაწინააღმდეგო ნაღმების გამოყენებას.