უკრაინის სახალხო დამცველი ლუდმილა დენისოვა აცხადებს, რომ პენიტენციური სამსახურის მიერ გლდანის ციხეში გადაღებული ვიდეო უკრაინის მოქალაქე საქართველოს ექსპრეზიდენტ მიხეილ სააკაშვილის წამებასა და არაადამიანურ მოპყრობას ადასტურებს, რაც ადამიანის უფლებების დაცვის კონვენციის მესამე მუხლის დარღვევაა. დენისოვა, ასევე გაეროს კომიტეტსა და ევროპის წამებისა და არაადამიანური მოპყრობის პრევენციის კომიტეტს მოუწოდებს, სააკაშვილის საავადმყოფოში გადაყვანის დროს წამების ქმედებების ფაქტზე რეაგირება მოახდინონ.

"ცოტა ხნის წინ გამოქვეყნდა ვიდეო, რომელიც ადასტურებს უკრაინის მოქალაქის, მიხეილ სააკაშვილს საავადმყოფოში მოთავსებისას სპეციალური პენიტენციური სამსახურის მიერ ფიზიკური ძალის გამოყენებასა და სხეულის დაზიანებებს. ვიდეოში ნაჩვენებია მიხეილის წამება და არასათანადო მოპყრობა, ადამიანის უფლებათა და ძირითად თავისუფლებათა დაცვის კონვენციის მე-3 მუხლის უხეში დარღვევა. საქართველოს იუსტიციის სამინისტროს სპეციალური პენიტენციური სამსახურის გადაცდომით სამოქალაქო და პოლიტიკური უფლებების შესახებ საერთაშორისო პაქტის მე-7 და წამებისა და სხვა მუხლები დაირღვა", — ნათქვამია განცხადებაში

დენისოვა, ასევე, ქართველ კოლეგას ნინო ლომჯარიას მიმართავს, გულდასმით გამოიძიოს სპეციალური პენიტენციური სამსახურის თანამშრომლების მიერ მისი პირადი უსაფრთხოებისა და წამებისგან დაცვის უფლებების დარღვევის გარემოებები.

უკრაინის ომბუდსმენი კვლავ მოითხოვს, საქართველოს ხელისუფლებამ სააკაშვილი სათანადო სამედიცინო დაწესებულებაში სასწრაფოდ გადაიყვანოს.

დღეს, 11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. უწყება აქამდე ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

პენიტენციური სამსახური ამ ვიდეოს გამოქვეყნებასაც მაღალი საზოგადოებრივი ინტერესით ხსნის. უწყების განცხადებით, "კადრებში ნათლად ჩანს, როგორ არ ემორჩილება [სააკაშვილი] დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს".

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.

მიხეილ სააკაშვილი გლდანის ციხის საავადმყოფოში 8 ნოემბერს გადაიყვანეს. პენიტენციური სამსახური ამტკიცებდა, რომ ეს ნებაყოფლობითი იყო და უწყებამ ამის "დასადასტურებლად" კადრებიც გაავრცელა, სადაც ჩანს, რომ სააკაშვილი ნივთებს ალაგებს. თუმცა ექსპრეზიდენტის მონახულების შემდეგ სახალხო დამცველმა თქვა, რომ მიხეილ სააკაშვილის განცხადებით, ის გლდანში მოტყუებით გადაიყვანეს.