სახალხო დამცველი მოუწოდებს საზოგადოებას, თავი შეიკავონ საჯარო სივრცეში პენიტენციური სამსახურის თანამშრომლის შეურაცხყოფისა და მისი პოსტერების განთავსებისგან. საუბარია პირზე, რომელიც მედიასაშუალებების ნაწილის ინფორმაციით, სწორედ ის არის, ვინც გლდანის ციხეში შეყვანისას სააკაშვილს დაემუქრა.

ომბუდსმენი აღნიშნავს, რომ იდენტიფიცირებული პირის მიმართ შეურაცხმყოფელი და მადისკრედიტირებელი წარწერები და პოსტერები გავრცელდა როგორც ღია საჯარო სივრცეში, აგრეთვე, მის საცხოვრებელ კორპუსში. სახალხო დამცველი მიუღებლად მიიჩნევს გამოძიების დასრულებამდე, მოხელის პირადი ცხოვრების უფლებით დაცულ სფეროში ასეთ მასობრივ და უხეშ ჩარევას.

"მით უფრო, იმ პირობებში, როდესაც მედიასივრცეში გავრცელებული ინფორმაციის უტყუარობა დადასტურებული არ არის. ამასთან, სახალხო დამცველი კიდევ ერთხელ უსვამს ხაზს გამოხატვის ადრესატის ოჯახში მცხოვრები არასრულწლოვანის ფსიქო-ემოციური მდგომარეობის დაცვის საჭიროებას და მისი საუკეთესო ინტერესის გათვალისწინებით, მოუწოდებს საზოგადოებას, თავი შეიკავონ საჯარო სივრცეში პენიტენციური სამსახურის წარმომადგენლის მიმართ შეურაცხმყოფელი წარწერებისა და პოსტერების განთავსებისგან, რაც, შესაძლოა, ახალისებდეს, მათ შორის, ბავშვის მიმართ ძალადობას, ბულინგს თუ სხვაგვარ ქმედებას", — ვკითხულობთ განცხადებაში.

ამ თემაზე ომბუდსმენმა 9 ნოემბერს, მას შემდეგაც ისაუბრა, რაც გიგი უგულავამ აქციაზე თანამშრომლის სახელი თქვა და განაცხადა, რომ მასზე შვილებმა და მათმა კლასელებმაც უნდა იცოდნენ. სახალხო დამცველმა განაცხადა, რომ დაუშვებელია პოლიტიკური ოპონირების იარაღად ბავშვების, მათი პირადი ცხოვრებისა და ოჯახური სტატუსის გამოყენება. ნინო ლომჯარიამ მოუწოდა საჯარო პირებს და პოლიტიკოსებს, პოლიტიკური დებატებისას თუ სხვა ნებისმიერ პროცესში, იხელმძღვანელონ ბავშვის საუკეთესო ინტერესის დაცვის სტანდარტით და არ მოახდინონ ბავშვის მიმართ ძალადობის, ბულინგის თუ სხვაგვარი ქმედების წახალისება. კრიტიკის შემდეგ უგულავამ ბოდიში მოიხადა.

გლდანის ციხეში გადაყვანის შემდეგ მიხეილ სააკაშვილმა წერილი გაავრცელა, სადაც წერდა, რომ ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში". მისივე განცხადებით, მოითხოვა ამ ადამიანის სახელი და გვარი, თუმცა უარი უთხრეს.