რა ხდება: ნეტგაზეთის თანახმად, ივლიანე ხაინდრავამ, რუსული კანონის გამო, შერიგებისა და სამოქალაქო თანასწორობის საკითხებში სახელმწიფო მინისტრის მრჩევლის თანამდებობა დატოვა.

  • "დღეს დავტოვე განცხადება და წამოვედი. მე არ ვეთანხმები ხელისუფლების კურსს, რომელსაც ის დაადგა და შეუძლებლად მივიჩნევ შემდგომ თანამშრომლობას", — უთხრა მან გამოცემას და განმარტა, რომ უპირველეს ყოვლისა, გულისხმობს რუსულ კანონსა და მასთან დაკავშირებულ მოვლენებს.
  • "მე საკმაოდ ხანგრძლივი ცხოვრება განვლიე და დანამდვილებით ვიცი, რომ ისეთი პატარა ქვეყნისთვის და ერისთვის, როგორც ჩვენ ვართ, ასეთი დაძაბულობის და ურთიერთდაპირისპირების შექმნა არაფრით შეიძლება და არცერთი კანონი არ არის იმის ღირსი, რაც ახლა ხდება თბილისში", — თქვა მან ნეტგაზეთთან.

ივლიანე ხაინდრავაზე: ის შერიგებისა და სამოქალაქო თანასწორობის საკითხებში სახელმწიფო მინისტრის მრჩეველია. მანამდე უშიშროების საბჭოს მდივნის მოადგილე იყო.

  • ხაინდრავა ატარებს სალექციო კურსსაც "ეროვნული უსაფრთხოებისა და საჯარო პოლიტიკის" პროგრამის ფარგლებში, სახელწოდებით — "საქართველოს მეზობლები სამხრეთით, აზერბაიჯანი და სომხეთი".
  • ის, ასევე, 1992-1995 და 2004-2008 წლების მოწვევის პარლამენტის წევრია.

კონტექსტი: 9 მაისს, საფრანგეთში საქართველოს ყოფილმა ელჩმა, გოჩა ჯავახიშვილმა, ფეისბუქზე დაწერა, რომ თანამდებობას ტოვებს: "მე ვეღარ ვხედავ ჩემს როლსა და რესურსს ამ მიმართულებით: ევროპისკენ მივდიოდე და ევროპისგან ვიცავდე თავს", — აღნიშნა მან.

  • საქართველოს საგარეო საქმეთა მინისტრმა ილია დარჩიაშვილმა კი განაცხადა, რომ ამით, გოჩა ჯავახიშვილმა, "შეურაცხყოფა მიაყენა როგორც სახელმწიფოს, ისე უწყებას". ჯავახიშვილის გადაწყვეტილება მწვავედ გააკრიტიკეს ხელისუფლების სხვა მაღალჩინოსნებმაც.