მოკლედ: ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის თვითმმართველობა რუსულ კანონის საწინააღმდეგოდ განცხადებას ავრცელებს.

  • საქართველოს პრემიერ-მინისტრი, ირაკლი კობახიძე, როგორც პროფესორი, კონსტიტუციური სამართლის მიმართულებით კითხულობს ლექციებს ამ ფაკულტეტის სტუდენტებისთვის.
  • ფაკულტეტის თვითმმართველობა აღნიშნავს, რომ ცენტრალური თვითმმართველობის დამოკიდებულებიდან გამომდინარე, იძულებულები არიან, მიიღონ პროტესტის რადიკალურ ზომები: "ვუერთდებით სტუდენტთა და ლექტორთა გაფიცვას. ვწყვეტთ სამუშაო პროცესს, მაგრამ არ ვწყვეტთ თქვენს მხარდაჭერასა და თქვენთვის ბრძოლას. მოგიწოდებთ ყველა სხვა ფაკულტეტისა და უნივერსიტეტების თვითმმართველობებს, დადექით თქვენი სტუდენტების მხარეს, ძალა ერთობაშია!", — აცხადებენ ისინი.

დეტალები: იურიდიული ფაკულტეტის თვითმმართველობის განცხადებაში აღნიშნულია, რომ რუსული კანონის დაანონსების პირველივე დღეებიდან მკაფიოდ ემიჯნებიან მას.

ანალოგიური, კანონპროექტისგან გამიჯვნის მოთხოვნა აქვთ მათ უნივერსიტეტის ცენტრალური თვითმმართველობის მიმართაც, რომელიც, მათი შეფასებით, კვლავ თავს იკავებს პოზიციის დაფიქსირებისგან. "მაქსიმალურად ცდილობს, დაგვაბრკოლოს", — აცხადებს ფაკულტეტის თვითმმართველობა უნივერსიტეტის თვითმმართველობის შესახებ.

განცხადებიდან: "მიგვაჩნია რომ “რუსული კანონის” წინააღმდეგ ბრძოლა ცდება პოლიტიკურ ჭრილს და ეროვნული მნიშვნელობისაა. შესაბამისად, თამამად და მკაფიოდ ვუჭერთ მხარს ყველა იმ ადამიანს, რომელიც ეწინააღმდეგება აღნიშნულ კანონს.

  • თბილისის სახელმწიფო უნივერსიტეტის იურიდიული ფაკულტეტის სტუდენტური თვითმმართველობა გვაერთიანებს იურისტებს, რომლებმაც საკუთარ თავზე ავიღეთ სტუდენტებისათვის ევროპული ხარისხის განათლების მიწოდება და საუნივერსიტეტო სივრცის მათთვის ძვირფას ადგილად გარდაქმნა.
  • ჩვენ გვაერთიანებს სამართლიანობისათვის ბრძოლის მიზანი.
  • მიგვაჩნია, რომ აღნიშნული კანონის მიღებით ჩვენი თითოეული პროექტი აზრს კარგავს, ვინაიდან ამით ქვეყანა შორდება ერთადერთ და უალტერნატივო — ევროპულ კურსს."