რა ხდება: დღეს, 13 მაისს, არასამთავრობო სექტორის წარმომადგენლები, ასევე, საპარლამენტო და არასაპარლამენტო ოპოზიცია, თბილისში ვიზიტით მყოფ გერმანიის, პოლონეთის, ჩეხეთისა და ლიეტუვის საგარეო ურთიერთობათა კომიტეტის თავმჯდომარეებს შეხვდნენ.

  • შეხვედრაზე იმყოფებოდა ბაია პატარაიაც, საფარის ხელმძღვანელი.

დეტალები: "ევროკავშირი გვეუბნება იმას, რომ ყველაზე დიდი სანქცია, რასაც საქართველო პრაქტიკულად იღებს, ეს არის ევროატლანტიკური დღის წესრიგიდან მოხსნა", —თქვა პატარაიამ შეხვედრის დასრულების შემდეგ მედიასთან გაკეთებული კომენტარისას.

ასევე აღნიშნა, რომ "ცოტა შოკში არიან [ევროკავშირის ქვეყნების წარმომადგენლები], საერთოდ რომ არავინ შეხვდათ ხელისუფლებისგან. ეს, მათთვის, ძალიან მოულოდნელი იყო."

  • ბაია პატარაიას თანახმად, შეხვედრისას ევროკავშირის ქვეყნების წარმომადგენლებისგან ითქვა, რომ "ძალიან სერიოზული მოლაპარაკებები მიდის" უკრაინასთან, მოლდოვასთან, მათ შორის, ნატოს-თან დაკავშირებულ საკითხებზე. საქართველო კი, არ განიხილება.

ამავე შეხვედრიდან: ძვირფასო მთავრობავ, შეაჩერეთ ეს კანონი. თუ არ გაიწვევთ, ვერ ვხედავ პირობებს საქართველოს ნათელი მომავლისთვის — მიხაელ როთი

ბაია პატარაია: "ისინი ამბობენ, რომ უკრაინა და მოლდოვა ძალიან წინ არიან, მოლაპარაკებები დაწყებულია, ხოლო საქართველოსთან მოლაპარაკებების დაწყება აღარ განიხილება.

  • მათ თქვეს, რომ ყველაზე სერიოზულს, რასაც ჩვენ ახლა ვკარგავთ, ეს არის ზოგადად მხარდაჭერა და ძალიან დიდი შეფერხება ევროინტეგრაციის და ნატო-ს გზაზე.
  • რაც შეეხება სხვა ტიპის სანქციებს, განიხილება ყველაფერი, თუმცა, მათ აქვთ საკმაოდ სერიოზული ბიუროკრატია და სჭირდებათ დიდი კონსენსუსი."

ამავე თემაზე: რა გავიგეთ ოპოზიციონერებისგან თბილისში ვიზიტად მყოფი ევროპის ქვეყნების საგარეო ურთიერთობათა კომიტეტის თავმჯდომარეებთან შეხვედრის შემდეგ

ბოლო ხაზი: დღეს დილით, ღიად ანტიდასავლურმა სამთავრობო პარტიამ, ხალხის ძალამ განაცხადა, რომ ხელისუფლებამ უნდა იმსჯელოს, იმსახურებენ თუ არა ქვეყანაში შემოშვებას დასავლელი პოლიტიკოსები.

გაიგე მეტი: დასავლელი დიპლომატების სია — სამთავრობო პარტია ქვეყანაში მათი არ შემოშვების საკითხს განიხილავს