რუსეთის პრეზიდენტი ვლადიმირ პუტინი და სომხეთის პრემიერ-მინისტრი ნიკოლ ფაშინიანი მოსკოვში გამართულ შეხვედრაზე შეთანხმდნენ, რომ სომხეთის რამდენიმე რეგიონიდან რუსი სამხედროები და მესაზღვრეები გავლენ.

რუსეთის პრეზიდენტის პრესმდივანმა დმიტრი პესკოვმა განუცხადა სახელმწიფო საინფორმაციო სააგენტო RIA Novosti-ს, რომ რუსი მესაზღვრეები დარჩებიან სომხეთის საზღვრებზე ირანთან და თურქეთთან, "სომხური მხარის მოთხოვნით".

პესკოვმა თქვა, რომ გადაწყვეტილება კრემლში ფაშინიანსა და პუტინს შორის პირისპირ შეხვედრაზე მიიღეს.

პუტინისა და ფაშინიანის შეხვედრა ევრაზიული ეკონომიკური კავშირის (EAEU) 10 წლის იუბილესადმი მიძღვნილი სამიტის შემდეგ გაიმართა.

"2020 წლის შემოდგომაზე, სომხური მხარის მოთხოვნით, ჩვენი ჯარისკაცები და მესაზღვრეები განლაგდნენ სომხურ რეგიონებში“, — ციტირებს რუსული ინტერფაქსი პესკოვის სიტყვებს. "ფაშინიანმა თქვა, რომ დღეს, შეცვლილი პირობების გამო, ასეთი საჭიროება აღარ არის, ამიტომ პრეზიდენტი პუტინი დათანხმდა და მხარეები შეთანხმდნენ ჩვენი სამხედროების და მესაზღვრეების გაყვანაზე“, — აღნიშნა მან.

აზერბაიჯანის საზღვარზე რუსული სამხედროების ყოფნით სომხეთში უკმაყოფილოები იყვნენ, რადგან ისინი სრულიად უმოქმედოები იყვნენ სომხეთში აზერბაიჯანის ჯარის რამდენიმე შეჭრის დროს. თებერვალში, ევროკავშირის სამოქალაქო სადამკვირვებლო მისიამ საზღვარზე რუსი ჯარები დაადანაშაულა მუშაობის შეფერხებაში.

სომხეთის მმართველი პარტია სამოქალაქო კონტრაქტის საპარლამენტო ფრაქციის ხელმძღვანელმა, ჰაიკ კონჯორიანმა ფეისბუქზე დაწერა, რომ შეთანხმების მიხედვით, რუსი მესაზღვრეები და სამხედრო პუნქტები ტავუშის, სიუნიკის, ვაიოც ძორის, გეღარქუნიკისა და არარატის რეგიონებიდან გავლენ.

კონჯორიანმა თქვა, რომ რუსეთი და სომხეთი, ასევე, შეთანხმდნენ ერევნის ზვარტნოცის აეროპორტიდან რუსი მესაზღვრეების გასვლის შესახებ.

ამასთან, აზერბაიჯანი და სომხეთის შეთანხმების მიხედვით, 19 აპრილს ტავუშის პროვინციაში დაიწყო მათი საერთო საზღვრის დელიმიტაცია, რამაც სომხეთის საზღვრისპირა სოფლებში მცხოვრები ხალხის პროტესტი გამოიწვია.

მარტში ბაქომ მოითხოვა ოთხი სოფლის "დაუყოვნებლივ გათავისუფლება". რამდენიმე დღის შემდეგ პრემიერ-მინისტრმა ნიკოლ ფაშინიანმა მიანიშნა, რომ სომხეთმა შესაძლოა ოთხი სოფლის კონტროლი დაუბრუნოს აზერბაიჯანს, ტერიტორიის ცალმხრივად გადაცემით, ომის თავიდან ასაცილებლად.

ვიქტორ ბონდარევმა, რუსეთის საბჭოს თავდაცვის კომიტეტის თავმჯდომარის პირველმა მოადგილემ, რიას განუცხადა, რომ სომხეთიდან რუსული ჯარების გაყვანა ესკალაციის საფრთხეს ქმნის, რადგან მესაზღვრეები რეგიონში უსაფრთხოებას უზრუნველყოფდნენ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.