მოკლედ: დღეს, 13 მაისს, რუსული კანონის საპროტესტო აქციაზე დაკავებული გუკა რჩეულიშვილის ადვოკატმა ბექა ბასილაიამ On.ge-ის უთხრა, რომ მისი დაცვის ქვეშ მყოფი ნაცემია, აქვს სისხლჩაქცევები და სავარაუდოდ, ცხვირი აქვს გატეხილი.

  • "უკანონო, არაადამიანური მოპყრობის ქვეშ იყო [გუკა რჩეულიშვილი] მას შემდეგ, რაც პოლიციამ შეითრია მათ რიგებში", — თქვა ადვოკატმა.

დეტალები: ბასილაიამ On.ge-სთან თქვა, რომ საპროტესტო აქციაზე გუკა რჩეულიშვილის დაკავების არავითარი სამართლებრივი საფუძველი არ არსებობდა: "მეგაფონით მიმართავდა პოლიციას, ამ ქვეყნის შვილები ხართ თქვენცო, რა დროსაც, პოლიციამ შეითრია და სცემა".

  • ადვოკატის თქმით, სპეციალურ საგამოძიებო სამსახურს უკვე მიმართეს, თუმცა, ამ დრომდე, მათგან რეაგირება არ მომხდარა: "რომ არ მოგატყუოთ, მათი მხრიდან ადეკვატური ქცევის დიდი იმედი და მოლოდინი არ მაქვს".
  • გუკა რჩეულიშვილი, ამჟამად, ზაჰესის იზოლატორშია.

მსგავსი: საპროტესტო აქციაზე დაკავებული გურამ ადამია, რომელსაც ფიზიკურად გაუსწორდნენ, იზოლატორიდან კლინიკაში გადაიყვანეს

კონტექსტი: დღეს, შინაგან საქმეთა სამინისტრომ, საქართველოს პარლამენტთან, რუსული კანონის საპროტესტო აქციის 20 მონაწილე დააკავა.

  • საპროტესტო აქციიდან, მედიასაშუალებებმა გაავრცელეს ვიდეო კადრები, სადაც ჩანს თუ როგორ უსწორდებიან სპეცრაზმელები მოქალაქეებს ფიზიკურად და აკავებენ.
  • პოლიციის მხრიდან, მოქალაქეთა მიმართ არასათანადო მოპყრობის ფაქტებზე, სახალხო დამცველმა, ლევან იოსელიანმაც განაცხადა. მან შინაგან საქმეთა სამინისტროს მოუწოდა იმოქმედოს კანონმდებლობის ფარგლებში.

გაიგე მეტი: DRI: აქციის მონაწილეთა მიმართ გამოყენებული ფიზიკური ანგარიშსწორება ვერ ჩაითვლება კანონიერ საპოლიციო ღონისძიებად