მოკლედ: რუსმა ულტრაკონსერვატორმა და "რუსული სამყაროს" იდეოლოგმა ალექსანდრ დუგინმა განაცხადა, რომ საქართველოში, სომხეთისგან განსხვავებით, უცხო ქვეყნების აგენტები აწყობენ ჯანყს.

  • ამის შესახებ დუგინი ტელეგრამზე წერს.

დეტალები: "სახალხო მღელვარება საქართველოსა და სომხეთში პირდაპირ ურთიერთსაწინააღმდეგოა. საქართველოში უცხოელი აგენტები აწყობენ ჯანყს, სომხეთში კი — პატრიოტები", — დაწერა დუგინმა.

  • მან რუსული კანონი აქამდეც არაერთხელ მოიწონა.
  • დუგინმა კანონპროექტის გამო საქართველოს მთავრობაც შეაქო და თქვა, რომ "საქართველო სწორ გზაზეა".

რა ხდება სომხეთში: ერევანში საპროტესტო აქციებია. მოსახლეობის ნაწილი აპროტესტებს სომხეთის მიერ აზერბაიჯანისთვის სამი სოფლის გადაცემას.

  • ფაშინიანის განცხადებით, ეს გადაწყვეტილება ომის თავიდან ასაცილებლად მიიღეს.
  • ერევანმა განაცხადა, რომ სომხეთი და აზერბაიჯანი "წინასწარ შეთანხმდნენ" ორი ქვეყნის საერთო საზღვრის სხვადასხვა მონაკვეთების დელიმიტაციაზე და აღნიშნა, რომ დელიმიტაცია დაეფუძნება ალმატის დეკლარაციას.
  • ამასთან, რუსეთი და სომხეთი, სომხეთიდან რუსი მესაზღვრეების გაყვანაზე შეთანხმდნენ. ერევანი ცდილობს რუსეთისგან დისტანცირებას და მჭიდრო კავშირის დამყარებას დასავლეთთან.

ამჟამად, სომხეთში მიმდინარე საპროტესტო აქციების ლიდერი არქიეპისკოპოსი ბაგრატ გალსტანიანია, რომელიც ამბობს, რომ ქვეყანაში უნდა მოხდეს "ფუნდამენტური ცვლილება“ საგარეო პოლიტიკაში, გამოირიცხოს როგორც ანტირუსული, ისე ანტიდასავლური პოზიციები და გატარებულ იქნას შეკავების მოქნილი პოლიტიკა.