რა ხდება: ორგანიზაცია CENN-ი მიმართავს საქართველოს პარლამენტს, არ დაუჭიროს მხარი რუსული კანონის მიღებას მესამე მოსმენით ხვალ, პლენარულ სხდომაზე.

  • ორგანიზაცია აღნიშნავს, რომ პარლამენტის იურიდიულ საკითხთა კომიტეტმა კანონპროექტს მხარი დაუჭირა დემოკრატიის პრინციპების დარღვევით, მასობრივი საპროტესტო აქციების ფონზე.
  • მათ მხედველობაში აქვთ კომიტეტის დღევანდელი სხდომა, რომლის დაწყებიდან 64 წამში მოასწრო იურიდიულ საკითხთა კომიტეტმა რუსული კანონი მესამე მოსმენით მიღება.
  • CENN-ი არის განვითარების რეგიონული ორგანიზაცია, რომელიც სამხრეთ კავკასიის მასშტაბით გარემოს დაცვის მიმართულებით მუშაობს, მდგრადი განვითარებისა და მწვანე ზრდის ხელშეწყობის მიზნით.

განცხადება: "მივმართავთ საქართველოს პარლამენტს, ხვალ პლენარულ სხდომაზე, გამოიყენოს კიდევ ერთი შესაძლებლობა და უარი თქვას კანონპროექტის მიღებაზე, რომელიც წინააღმდეგობაში მოდის საქართველოს კონსტიტუციასთან.

  • გვინდა, თითოეულ პარლამენტარს შევახსენოთ, რომ ამ კანონპროექტის მხარდაჭერით ისინი იღებენ პასუხისმგებლობას ქვეყნის ევროპული კურსის ცვლილების დამღუპველ შედეგებზე, რაც არაერთხელ აღინიშნა ჩვენი დასავლელი პარტნიორების მიერ."

ბოლო ხაზი: ორგანიზაცია აცხადებს, რომ კანონის დამტკიცების შემთხვევაში, მათთვის დიდი გამოწვევა იქნება პარლამენტთან დიალოგის ფორმატის შენარჩუნება, რაც ქვეყანაში თანამშრომლობისგან მიღებულ სიკეთეებს შეამცირებს.