რა ხდება: ამ წუთებში, საქართველოს პარლამენტთან, რუსული კანონის გასაპროტესტებლად მოქალაქეები არიან შეკრებილი.

დეტალები: მრავალრიცხოვან საპროტესტო აქციას, რუსთაველის გამზირიდან მსვლელობით შეუერთდნენ სტუდენტები, რომელთა ნაწილმაც უარი თქვა სასწავლო პროცესზე მანამ, სანამ ხელისუფლება რუსულ კანონს უკან არ გაიწვევს.

  • სტუდენტების გაფიცვა 11 მაისს თსუ-ს სტუდენტებმა დაიწყეს, ორ დღეში კი მათ საქართველოს 30-ზე მეტი უნივერსიტეტის სტუდენტები შეუერთდნენ.
  • პარლამენტთან, რუსული კანონის წინააღმდეგ, შეზღუდული შესაძლებლობების მქონე პირებიც გამოვიდნენ.
  • ისინი რუსთაველის მეტროსთან შეიკრიბნენ, შემდეგ კი მსვლელობით შეუერთდნენ პარლამენტის წინ მიმდინარე დიდ პროტესტს.

ფოტო: მაიკო გაგუა/ On.ge

ფოტო: ნინო დიაკონიძე/ On.ge

კონტექსტი: საპროტესტო აქცია, ფაქტობრივად, გუშინ საღამოდან უწყვეტად მიმდინარეობს. რუსთაველის გამზირი მთელი დღის განმავლობაში გადაკეტილი იყო.

გუშინ მანიფესტანტებმა ღამე გაათენეს პარლამენტის შენობასთან.

  • ისინი, დღეს დილით, საპროტესტო შეძახილებით დახვდნენ დეპუტატებს, რომლებიც საკანონმდებლო ორგანოში საკომიტეტო მოსმენაზე რუსული კანონის მესამედ მხარდასაჭერად მივიდნენ.

  • დღეს, 13 მაისს, შინაგან საქმეთა სამინისტრომ, რუსული კანონის საპროტესტო აქციის 20 მონაწილე დააკავა.

გაიგე მეტი: მოვინახულეთ 23 დაკავებული, ყველა პოლიციის მხრიდან ძალადობაზე მიუთითებს და მათ დაზიანებებიც აქვთ — სახალხო დამცველის აპარატი