რა ხდება: სამთავრობო ტელევიზიებმა, იმედმა და რუსთავი 2-მა გაავრცელეს ინფორმაცია, რომ ამერიკის სახელმწიფო მდივნის თანაშემწეს ევროპისა და ევრაზიის საკითხებში, ჯიმ ო'ბრაიენს, რომელიც თბილისში გამთენიისას იქნება, ივანიშვილისთვის სანქციების პაკეტი ჩამოაქვს.

  • თუმცა, მალევე წაშალეს.

დეტალები: ინფორმაცია იმედის 5-საათიან გამოშვებაშიც გავიდა, შემდეგ კი საიტზეც განთავსდა და აღნიშნული იყო, რომ ო'ბრაიენთან შეხვედრის შემდეგ, ივანიშვილი გუნდის წევრებს, კანონთან დაკავშირებით, პოზიციის შერბილებას სთხოვდა.

ტელეკომპანია იმედის მიერ გავრცელებული ინფორმაცია, რომელიც წაიშალა

ტელეკომპანია იმედის მიერ გავრცელებული ინფორმაცია, რომელიც წაიშალა

ეს პუბლიკაცია იმედინიუსიდან რამდენიმე წუთში წაიშალა.

მოგვიანებით, ტელეკომპანია რუსთავი 2-მა ვებგვერდზე დადო იმავე შინაარსის სიახლე, თუმცა ისინი სამთავრობო ექსპერტს, ზაალ ანჯაფარიძეს ეყრდნობოდნენ.

წაშლილია რუსთავი 2-ის პუბლიკაციაც.

ზაალ ანჯაფარიძე ფეისბუქზე წერს: "გამთენიისას საქართველოში ჩამოდის აშშ-ის სახელმწიფო მდივნის თანაშემწე ჯიმ ო'ბრაიენი, რომელიც სანქციების დაწესების მთავარი კოორდინატორია.

  • არსებული ინფორმაციით მას ჩამოაქვს პირდაპირ კონკრეტული პაკეტი ბიძინა ივანიშვილის სანქციების და როდესაც ხვალ შედგება ეს შეხვედრა, ო'ბრაიენის და ბიძინა ივანიშვილის, საუბარი სწორედ ბიძინა ივანიშვილის სანქციებს შეეხება.
  • ამ შეხვედრის შემდეგ მმართველი გუნდის საპატიო თავმჯდომარე მიმართავს გუნდის წევრებს, რომ გაითვალისწინონ მისი თხოვნა და გამჭვირვალობის კანონთან დაკავშირებით პოზიციები შერბილდეს. ვნახოთ, როგორ განვითარდება მოვლენები."

რა ვიცით ჯიმ ო'ბრაიენის ვიზიტზე, ოფიციალურად: სახელმწიფო დეპარტამენტის ინფორმაციით, ამერიკელი მაღალჩინოსანი შეხვდება მთავრობის, სამოქალაქო საზოგადოებისა და კერძო სექტორის წარმომადგენლებს, "რათა გამოხატოს შეერთებული შტატების მტკიცე ერთგულება ქართველი ხალხისადმი და საქართველოს მისწრაფებისადმი მშვიდობიანი და უსაფრთხო ევროატლანტიკური მომავლისკენ".

გაიგე მეტი: ო'ბრაიენი: თუ საქართველოს ხელისუფლება ე.წ. რუსულ კანონს მიიღებს, ვითარება ჩვენთვის ნათელი გახდება [ინტერვიუ]