იუსტიციის სამინისტროსთან გამართულ ოპოზიციის აქციაზე თბილისის პოლიციის დეპარტამენტის დირექტორის მოადგილემ, თემურ კუპატაძემ ნაციონალური მოძრაობის წევრს, ლევან ხაბეიშვილს "კამერებთან კეკლუცი", "ინტრიგანი", "პროვოკატორი" და "უზრდელი" უწოდა.

"ეს არის კამერებთან კეკლუცი ადამიანი, შენ კეკლუცობ კამერებთან. შენ ხარ კეკლუცი, მოცეკვავე კამერებთან, მეტი არაფერი. შენ ჩინოვნიკი რომ გახდები, ვერასდროს ვერაფერს ვერ გააკეთებ. შენ ხარ ინტრიგანი, პროვოკატორი ადამიანი. უზრდელობა არის შენი მოგონილი. შენ ხარ უზრდელი, რომ დაიბადე იმის მერე", — მიმართა ხაბეიშვილს კუპატაძემ.

ყოფილი პრეზიდენტის, მიხეილ სააკაშვილის სამოქალაქო კლინიკაში გადაყვანის მოთხოვნით 3 სხვადასხვა ადგილას აქცია დაიგეგმა. აქტივისტები ჯანდაცვისა და იუსტიციის სამინისტროებთან, ასევე, სახელმწიფო უსაფრთხოების სამსახურის შენობასთან შეიკრიბნენ.

აქციის მონაწილეობმა სასამართლოსთან გადაინაცვლეს, სადაც მიხეილ სააკაშვილის სასამართლო პროცესია ჩანიშნული. თუმცა, პენიტენციურმა სამსახურმა სააკაშვილს სასამართლო სხდომაზე დასწრებაზე უარი უთხრა.

შინაგან საქმეთა სამინისტროს ინფორმაციით, დღეს გამართულ აქციებზე პოლიციამ ჯამში 46 ადამიანი დააკავა.