დემოკრატიულ ინიციატივაში (GDI) აცხადებენ, რომ სასამართლოს მიერ პოლიციელის გინების გამო თბილისი პრაიდის დამფუძნებლის, გიორგი თაბაგარის სამართალდამრღვევად ცნობა ეწინააღმდეგება გამოხატვის თავისუფლების კონსტიტუციურ სტანდარტებს. ორგანიზაციაში აცხადებენ, რომ ეს ქმნის აქტივისტების მიმართ კიდევ უფრო რეპრესიული პოლიტიკა გატარების საშიშ პრეცედენტს.

საქმე ეხება თბილისის საქალაქო სასამართლოს მოსამართლის, ლელა ცაგარეიშვილის გადაწყვეტილებას, რომელმაც დღეს, 22 ოქტომბერს, გიორგი თაბაგარი პოლიციელის სიტყვიერი შეურაცხყოფის გამო სამართალდამრღვევად ცნო და შენიშვნა მისცა. თაბაგარის ინტერესებს სასამართლოში სწორედ დემოკრატიული ინიციატივა იცავდა.

"იმ ფონზე, როდესაც 5 ივლისს განხორციელებული ძალადობის ორგანიზატორები დღემდე არ არიან პასუხისგებაში მიცემულნი, დაზარალებულთა სანქცირება საზოგადოებაში აგზავნის მესიჯს, რომ სახელმწიფო არა დაზარალებულების, არამედ სწორედ მოძალადეების მხარესაა, შესაბამისად ამით სახელმწიფო ახალისებს ძალადობას", — აცხადებენ ორგანიზაციაში.

შემთხვევა 5 ივლისს, ძალადობრივი კონტრაქციის დროს მოხდა. მას შემდეგ, რაც თბილისი პრაიდის ოფისი ჰომოფობიურმა ჯგუფებმა დაარბიეს, ორგანიზაციის წევრები კი მათგან თავის დაცვასა და უსაფრთხო სივრცემდე გადაადგილებას ცდილობდნენ, თაბაგარს დაურეკა პოლიციელმა, გიორგი მაჭარაშვილმა და პრაიდის ოფისში მისვლა სთხოვა. როგორც მხარეები აცხადებენ, პოლიციელმა მიზეზად პრაიდის ოფისში საგამოძიებო მოქმედებების ჩასატარებლად მისი ნებართვა და თანხლება დაასახელა. სატელეფონო კომუნიკაციის დროს თაბაგარმა პოლიციელს სიტყვიერი შეურაცხყოფა მიაყენა. შინაგან საქმეთა სამინისტრო თაბაგარს ადმინისტრაციულ სამართალდარღვევათა კოდექსის 173-ე მუხლის დარღვევას ედავებოდა, რაც სამართალდამცავი ორგანოს წარმომადგენლის შეურაცხყოფას გულისხმობს. უწყება თაბაგარის 15-დღიან პატიმრობას ითხოვდა.

დემოკრატიულ ინიციატივაში განმარტავენ, რომ იმ მომენტში, როცა თაბაგარს პოლიციელმა დაურეკა, მისსა და მისი თანმხლები პირების ჯანმრთელობასა და სიცოცხლეს საფრთხე ემუქრებოდა. ისინი მოძალადე ჯგუფებისგან დამალვას სწორედ იმიტომ ცდილობდნენ, რომ პოლიცია ვერ უზრუნველყოფდა მათი უსაფრთხოების დაცვას. ორგანიზაციაში აცხადებენ, რომ ამ სიტუაციაში პოლიციელის თხოვნაზე, მისულიყო ძალადობის ეპიცენტრში, გიორგი თაბაგარს "ბუნებრივი რეაქცია" ჰქონდა, რაც, მათივე შეფასებით, ჯდება გამოხატვის თავისუფლების ფარგლებში.

"გიორგი თაბაგარის მიერ პოლიციის კრიტიკა სრულიად ექცევა საქართველოს კონსტიტუციის მე-17 და ევროპული კონვენციის მე-10 მუხლებით გათვალისწინებული გამოხატვის თავისუფლებით დაცულ სფეროში. საქართველოს საკონსტიტუციო სასამართლომ გამოხატვის თავისუფლების დაცვის ამერიკული სტანდარტი დაამკვიდრა, რომლის შესაბამისადაც გამოხატვის თავისუფლების შეზღუდვა შესაძლებელია მხოლოდ ძალადობის მყისიერი და რეალური საფრთხის არსებობის შემთხვევაში", — აცხადებენ ორგანიზაციაში.

თაბაგარის ადვოკატი, გიორგი ტაბატაძე განმარტავს, რომ რადგან თაბაგარსა და პოლიციელს შორის საუბარი ტელეფონით შედგა, ძალადობის მყისიერი საფრთხე არ არსებობდა, შესაბამისად, აღნიშნული შემთხვევა ჯდება გამოხატვის თავისუფლების ფარგლებში.

"პოლიციის კრიტიკის აკრძალვა არის, ალბათ, ყველაზე უფრო საშიში რამ, რაც შეიძლება გააკეთოს სამართალდამცავმა უწყებებმა, სასამართლომ [...] პოლიციის კრიტიკის გამო თუ ადამიანებს დასჯიან და ციხეში გაუშვებენ, ამ ქვეყანაში აღარ დარჩება თავისუფალი აზრის ადგილი", — განაცხადა ტაბატაძემ სასამართლო პროცესზე.

სასამართლო პროცესისას დაცვის მხარე აპელირებდა არა მხოლოდ კონკრეტული ნორმის განმარტების სამართლებრივ მხარეზე, არამედ იმ კონტექსტზე, რა პირობებშიც მოხდა შემთხვევა.

"გიორგი თაბაგარის მიერ გამოხატული სიტყვები მიმართული იყო არა ერთი კონკრეტული პოლიციელის, გიორგი მაჭარაშვილის მიმართ, არამედ ზოგადად პოლიციის ინსტიტუტის მიმართ. იმიტომ, რომ იმ დღეს პოლიცია არ იდგა დაზარალებული პირების დაცვის სადარაჯოზე და პირიქით, შეინიშნებოდა, როგორც აღვნიშნეთ, თანამშრომლობა მოძალადე ჯგუფებთან", — განაცხადა პროცესზე თაბაგარის კიდევ ერთმა ადვოკატმა, მარიამ კაპანაძემ.

კაპანაძის შეფასებით, სირცხვილია, რომ მაშინ, როცა 5 ივლისის ძალადობრივი კონტრაქციის ორგანიზატორები არ არიან დასჯილები, შინაგან საქმეთა სამინისტრო რესურსს ხარჯავს ამ დღის ერთ-ერთი დაზარალებულისთვის პატიმრობის მოთხოვნაში.

რაც შეეხება ბრალდების მხარეს, შსს-ს სასამართლოსთან ურთიერთობის სამმართველოს უფროსი, მარიამ კერესელიძე აცხადებდა, რომ უნდა გაიმიჯნოს ერთმანეთისგან ის რაც 5 ივლისის ძალადობრივ კონტრაქციაზე ხდებოდა და ის საუბარი, რაც თაბაგარსა და პოლიციელს შორის შედგა.

"მესმის, რომ გარეთ რთული სიტუაცია იყო, მაგრამ, ეს ყველაფერი არ გაძლევდათ თქვენ იმის უფლებას, რომ სამსახურეობრივი მოვალეობის მიზნით მოსული პოლიციელისათვის მიგეყენებინათ სიტყვიერი შეურაცხყოფა [...] ბატონ გიორგის ძალიან მარტივად შეეძლო ეთქვა, რომ ასეთი სიტუაციაა და მე ამ ეტაპზე ვერ მივიღებ მონაწილეობას ამ საგამოძიებო მოქმედებებში. ბუნებრივია, სხვაგვარად დაიგეგმებოდა ეს პროცედურები. მაგრამ, აქ პრეტენზია იმასთან დაკავშირებით კი არ იყო, რომ რა დროს ეს ზარია და ა.შ. ანუ, ახსნაც არ წამოვიდა სავარაუდო სამართალდამრღვევისგან, იმიტომ, რომ ის პირდაპირ შეურაცხყოფაზე გადმოვიდა", — განაცხადა კერესელიძემ სასამართლო სხდომაზე.

კერესელიძის თქმით, სამართალდარღვევაზე სახდელის შემსუბუქებაზე საუბარი იმ შემთხვევაში იქნებოდა შესაძლებელი, თუ თაბაგარი თავის საქციელს ნანობდა. თუმცა, მან სასამართლოს წარუდგინა ფეისბუქპოსტი, სადაც თაბაგარი ამ შემთხვევის შესახებ ყვება. კერესელიძის შეფასებით, ამ პოსტით გიორგი თაბაგარი "თავს იწონებდა" პოლიციელის გინების გამო.

"იმ დროს, როცა გინების ფაქტს ადგილი ჰქონდა, სავარაუდო სამართალდამრღვევს შეეძლო განეცხადებინა, რომ ეს იყო, თუნდაც, აფექტის მდგომარეობა, რომელშიც მოუწია მას აღნიშნული და დღეს ის თავისი გადმოსახედიდან ნანობს ამას და მიიჩნევს, რომ არ იყო ეს სწორი ქმედება, მაგრამ, პირიქით, თქვენ საქმეში გიდევთ ფეისბუქის პოსტი, სადაც ადამიანი თავს იწონებს, რომ პოლიციას აგინა", — განაცხადა კერესელიძემ.

თავად გიორგი თაბაგარმა სასამართლო პროცესზე განაცხადა, რომ კანონმორჩილი მოქალაქეა და პატივს სცემს პოლიციის ინსტიტუტს. მან გაიხსენა 5 ივლისს განვითარებული მოვლენები და განმარტა ის გარემოებები, რა დროსაც მოუწია პოლიციელთან კომუნიკაცია.

"მთელი დღის განმავლობაში მე პირადად არ მქონია არცერთი მომენტი, როდესაც მე თავი დაცულად ვიგრძენი, რომ აი, ახლა პოლიციელი, რომელიც თვალითაც არ მინახავს, მაგრამ, რომც დამენახა, მე არ მქონდა იმის იმედი, რომ პოლიციელები მე დახმარებას აღმომიჩენდნენ [...] ადვოკატმა აქ ისაუბრა, თითქოს მე აქ თავს ვიწონებდი პოლიციელის შეურაცხყოფით. არ არის ეს ასე. მე თავს არ ვიწონებდი. მე, უბრალოდ, შეძრწუნებული ვარ იმ აბსურდული საქმით, რომელშიც მე ახლა ვმონაწილეობ. მე არ ვთვლი, რომ იმ პირობებში, როცა არც ერთი მოძალადე და არც ერთი ძალადობის ორგანიზატორი ადამიანი პასუხისგებაში არ არის მიცემული, პოლიცია და ის სისტემა, რომელიც სამართლიანობის მხარეს უნდა იდგეს, მე, როგორც დაზარალებულს უნდა მიბარებდეს დაკითხვაზე, ითხოვს ჩემს პატიმრობას", — განაცხადა გიორგი თაბაგარმა.

თაბაგარი აპირებს საქალაქო სასამართლოს გადაწყვეტილება სააპელაციოში გაასაჩივროს, რადგან მიაჩნია, რომ სიტყვიერი შენიშვნა, რომელიც მას სასამართლომ მისცა, უკანონოა.

გაიგე მეტი: