პრემიერმინისტრი ირაკლი ღარიბაშვილი ევროპარლამენტების მიმართ კვლავ კრიტიკულ ტონს ინარჩუნებს. ამჯერად მან ისინი "დიქტატორისა" და "მკვლელის გამოზრდაში" დაადანაშაულა. ეს ტერმინები ღარიბაშვილმა სააკაშვილის დასახასიათებლად გამოიყენა და ექსპრეზიდენტი მკვლელობაში დაადანაშაულა.

თავდაპირველად პრემიერმინისტრი მხოლოდ ერთ ევროპარლამენტარზე, რაფაელ გლუქსმანზე ამბობდა, თუმცა მალევე მრავლობით რიცხვში დაიწყო საუბარი და თქვა, რომ "ამ ადამიანების" რჩევები და მოწოდებები არ აინტერესებს და "მათ" უნდა მიეხედათ სააკაშვილისთვის.

"ერთ-ერთი ევროპარლამენტარი, რომელიც არის სააკაშვილის პირადი მეგობარი. ვანო მერაბიშვილის, ამ მჩაგვრელი ადამიანის დროს, ვანო მერაბიშვილის მოადგილე იყო ქალბატონი ეკა ზღულაძე და ზღულაძის მეუღლე, ბატონი გლუქსმანი გამოდის ყოველდღე ბრძნული რჩევებით და ჭკუას გვარიგებს. ჩემი პოზიცია იყო, რა თქმა უნდა, არ მაინტერესებს ამ ადამიანების არც რჩევა, არც მათი მოწოდება.

მე ვეკითხები ხალხს, უნდა მაინტერესებდეს ამ ადამიანების რჩევა? მათ მიეხედათ სააკაშვილისთვის, როცა გამოზარდეს ეგ დიქტატორი, როცა მკვლელი, რომელიც გამოზარდეს, რომელმაც დაანგრია ჩვენი ქვეყანა. სააკაშვილმა, მელიამ და ყველამ ამ ბანდამ, რომელიც აქ თარეშობდა", — აცხადებს ღარიბაშვილი.

ჟურნალისტმა აღნიშნა, რომ საუბარი მხოლოდ ერთ ევროპარლამენტარზე არ არის, თუმცა ღარიბაშვილმა ეს რეპლიკა უყურადღებოდ დატოვა და თქვა, რომ ზუგდიდსა და საქართველოში სააკაშვილების, კოდუების, ახალაიების და ქარდავების დრო არ დაბრუნდება.

სააკაშვილის მხარდამჭერი განცხადებებისა და ქართული ოცნების კრიტიკის პასუხად, მმართველმა გუნდმა ევროპარლამენტარების კრიტიკა დაიწყო. მაგალითად, 20 ოქტომბერს პრემიერმინისტრმა განაცხადა, რომ ევროპარლამენტარები ანა ფოტიგა და ანდრიუს კუბილიუსი "ჩვენი ქვეყნისთვის არაფერს წარმოადგენენ". მისი თქმით, ამ ევროპარლამენტარების ჭკუით არ ივლის და სჯობს, მათ საკუთარ ქვეყანას მიხედონ.

პრემიერმინისტრს ნათქვამი აქვს ისიც, რომ "ვიღაც ევროპარლამენტარები ბრძნული სახით გვაძლევს ბრძნულ რჩევებს" და ეს მუდმივი სპეკულაციის საგანია. ღარიბაშვილმა ხაზი გაუსვა, რომ მისთვის ევროპარლამენტარების ნათქვამს არავითარი მნიშვნელობა არ აქვს.

ევროპარლამეტარებისადმი მმართველი გუნდის რიტორიკა რომ მსგავსია, ამას ადასტურებს პარტიის თავმჯდომარის, ირაკლი კობახიძის განცხადებებიც. მან ისინი "ნაცმოძრაობის ლობისტებად" მოიხსენია და თქვა, რომ ქართული მართლმსაჯულების პოლიტიზებას ვეღარასდროს განახორციელებენ. პარტიის ერთ-ერთმა ლიდერმა, გია ვოლსკიმ კი მათ ექსპრეზიდენტ მიხეილ სააკაშვილის მხარდამჭერ ღია წერილს ფარისევლური უწოდა.

დღეს, 21 ოქტომბერს ევროკავშირის ელჩი პრემიერმინისტრის განცხადებებს გამოეხმაურა და თქვა, რომ ის ევროპარლამენტარები, რომლებმაც სააკაშვილის მხარდამჭერ ღია წერილს ხელი მოაწერეს, ევროპარლამენტის მუშაობაში მნიშვნელოვან როლს თამაშობენ. მისივე თქმით, კომენტარები, რომლებსაც ინდივიდუალური ევროპარლამენტარები აკეთებენ, მათი გადაწყვეტილებაა და მათზეა დამოკიდებული.

ამავე თემაზე:

• პირადი ურთიერთობების საფუძველზე შექმნილი სუბიექტური მოსაზრებაა — ბოჭორიშვილი ევროპელი პოლიტიკოსების წერილზე
• კეთილი ინებონ და ყველამ პატივი სცეს სამართლებრივი სახელმწიფოს პრინციპს — ოხანაშვილი ღია წერილზე
• სარჯველაძის თქმით, გლუკსმანი მიკერძოებული ევროპარლამენტარია
• ნუ დააზიანებენ ჩვენს ქვეყანას — კობახიძე ევროპარლამენტარებზე