პარტია საქართველოსთვის გავრცელებული ფაილების საქმის გამოძიებაში სახალხო დამცველისა და საერთაშორისო ექსპერტების ჩართვას მოითხოვს. ექსპრემიერის პარტია, ასევე, ითხოვს შეიქმნას საპარლამენტო საგამოძიებო კომისია.

"აშკარაა, რომ ოცნება ისევ პარტიული ინტერესებით ხელმძღვანელობს და მათ ინტერესებში არ შედის დადგინდეს ხელისუფლება. შესაბამისად, ერთის მხრივ, მოვითხოვთ პროკურატურის მიერ დაწყებულ საგამოძიებო პროცესში ჩაერთოს სახალხო დამცველი და საერთაშორისო ექსპერტები. მეორეს მხრივ, კი საპარლამენტო მანდატის ფარგლებში, მოვითხოვთ საპარლამენტო საგამოძიებო კომისიის შექმნას, სადაც ასევე მიიღებენ მონაწილეობას სახალხო დამცველი და საერთაშორისო ექსპერტები. ამ ქვეყანაში ერთხელ და სამუდამოდ უნდა დასრულდეს ეს ბინძური მენკიერი პრაქტიკა", — განაცხადა პარტიის ერთ-ერთმა ლიდერმა, ბექა ლილუაშვილმა.

ექსპრემიერის პარტიის წევრი, ასევე ამბობს, რომ ისინი, როგორც მმართველი პარტიის ყოფილი წევრები, პასუხისმგებლობას იღებენ ქართულ ოცნებაში მათი ყოფნის დროს მომხდარ მოვლენებზე. მათ შორის იმაზე, რომ ვერ შექმნეს "საკმარისი ფუნდამენტი", რათა მსგავს ფაქტები არ მომხდარიყო.

"ჩვენ არაერთხელ აღვნიშნეთ, რომ პოლიტიკურ პასუხისმგებლობას ვიღებთ ოცნების მმართველობის დროს მიღწეულ, როგორც წარმატებაზე, ასევე წარუმატებლობაზე და ოცნების დღევანდელი ლიდერებისგან განსხვავებით იმაზეც, რომ მანდატის ფარგლებში, თუნდაც რეფორმების კუთხით, ვერ შევქმენით საკმარისი ფუნდამენტი, რომ ამგვარი მეთოდებით პოლიტიკურ ანგარიშსწორებას, უმსგავსობას ერთხელ და სამუდამოდ მოღებოდა ბოლო", — განაცხადა ბექა ლილუაშვილმა.

პრემიერმინისტრმა, ირაკლი ღარიბაშილმა განაცხადა, რომ პროკურატურა შეისწავლის ჩართული იყვნენ თუ არა ფაილების გავრცელების საქმეში ექსპრემიერი გიორგი გახარია და ალექსანდრე ხოჯევანიშვილი.

ფაილების გავრცელებაში გახარიას გუნდის შესაძლო ბრალეულობაზე პირველად კულტურის მინისტრმა, თეა წულუკიანმა ისაუბრა. მისივე თქმით, მან არაფერი იცის, უბრალოდ კითხვებს სვამს, რომლებიც ლეგიტიმური ჰგონია.

• არ ვიცი, შეიძლება იყოს ხოჯევანიშვილი, შეიძლება სხვა ვინმე — კალაძე ფარულ ჩანაწერებზე

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

• მედიის ოთხმა წარმომადგენელმა გავრცელებულ ჩანაწერებში საკუთარი საუბარი ამოიცნო
• რაც ვნახე მესენჯერიდან არის ძალიან ბევრი რამე — კვესიტაძე გავრცელებულ ჩანაწერებზე
• ხაზარაძე გავრცელებული ჩანაწერების ნამდვილობას ადასტურებს
• ტაბულას რედაქტორმა გავრცელებულ ფაილებში საკუთარი საუბარი ამოიცნო

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი:

• პედოფილია, პირადი ცხოვრების დეტალები და კავშირები რუსეთთან — რა წერია გავრცელებულ ფაილებში, ნაწილი I