ტაბულას რედაქტორი, ლევან სუთიძე ადასტურებს, რომ გასაჯაროებულ საიდუმლო ფაილებში მის შესახებ აღნიშნული ინფორმაცია ნამდვილია. უფრო მეტიც, ის ამბობს, რომ დოკუმენტებში აღნიშნულია მისი კომუნიკაცია სასულიერო პირთან არა მხოლოდ მობილურით, არამედ სოციალური ქსელითაც.

"მეც შემიძლია დავადასტურო, რომ ფაილების ნაწილში რამდენჯერმე ჩემი სახელი ისერჩება და, მათ შორის, აღწერილია საუბარი ჩემს ერთ-ერთ ახლობელთან, საქართველოს ეკლესიაში. სახელსა და გვარს მაინც არ დავწერ, მაგრამ არაფერი ისეთი ღია ხაზზე ვსაუბრობდით [...]

ამას გარდა, სავარაუდოდ არის ცნობა ერთ სასულიერო პირზე, რომელიც მათი აზრით ცნობებს მაწვდის "სოციალური ქსელის მეშვეობით" — აქაც, ტელეფონზეც განგვიხილია ეს და დარწმუნებული არ ვარ, რომ ჩეტი გატეხეს", — წერს სუთიძე.

ჟურნალისტის თქმით, კითხვის ნიშნები ჩნდება იმაზე, რა სახით მოხდა მის შესახებ ინფორმაციის შეგროვება.

"ერთ-ერთ აღწერილობაში ისერჩება, რომ ვიღაც მორჩილს ჰქონდა ჩემთან "ინტიმური ურთიერთობა" — არ ვიცი აქ სექსი იგულისხმება თუ არა, თუ კი, სრული ბულშითია. თუ არა, პირადი და ახლო ურთიერთობა რა თქმა უნდა მქონდეს, საერთო წრე გვყავს და ეს მაეჭვებს — ამის იდენტიფიცირება მობილურით მოხდა თუ ჭორების საფუძველზე. ბევრი ისეთი ინფორმაციაა, რომელიც ეკლესიის გაშუქების ჩემი 11 წლიანი გამოცდილებით, არის სრული მონაჩმახი", — აცხადებს ლევან სუთიძე.

მის მსგავსად, ფაილებში საკუთარი საუბარი ამოიცნო კიდევ რამდენიმე ჟურნალისტმა:

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.