საფრანგეთის ქალაქ კანში, ქართული ფეხბურთის ორი ვარსკვლავის, პსჟ-ს თავდამსხმელის, ხვიჩა კვარაცხელიასა და სენტ-ეტიენის ფეხბურთელის ზურიკო დავითაშვილის სახლი გაქურდეს. ამის შესახებ ფრანგული პრესა წერს.

მათი ცნობით, შემთხვევა მაშინ მოხდა, ფეხბურთელები სახლში არ იმყოფებოდნენ, ისინი ოჯახებთან ერთად ლაჟვარდოვან სანაპიროზე ისვენებდნენ.

მძარცველებმა რამდენიმე ძვირფასი ნივთი მოიპარეს, მათ შორის — სამკაული, საათები და ძვირფასი ჩანთები. მომხდარის შესახებ საფრანგეთის ხელისუფლებას ოფიციალური დეტალები ჯერ არ გაუვრცელებია.

ფრანგული გამოცემა წერს, რომ ქართველი ფეხბურთელები ქვეყანაში დიდი პოპულარობით სარგებლობს.

ხვიჩა კვარაცხელიას და ზურიკო დავითაშვილს ინციდენტის შესახებ საჯარო კომენტარი ჯერ არ გაუკეთებიათ.

ქართველი ფეხბურთელების სახლის გაქურდვის შესახებ ინფორმაცია თავდაპირველად Geo Team-მა გაავრცელა.

"კანში დასვენების დროს ხვიჩა კვარაცხელიას და ზურიკო დავითაშვილის სახლი გაქურდეს.

წაღებულია სახლიდან ყველაფერი: ძვირფასეულები, ჩანთები და საათები…

როგორც შევიტყვეთ, ქურდობა მაშინ მოხდა, როცა ფეხბურთელები ოჯახის წევრებთან ერთად გარეთ იმყოფებოდნენ.

საბედნიეროდ, დაშავებული არავინაა", — ნათქვამია Geo Team-ის მიერ გავრცელებულ ინფორმაციაში.

შეგახსენებთ, რომ ხვიჩა კვარაცხელია 2022 წელს ნეაპოლშიც გახდა მძარცველების მსხვერპლი. როგორც იტალიური გამოცემა "კორიერე დელო სპორტი" წერდა, მაშინ ქურდებმა ავტომობილი Mini Countryman მოიპარეს.