გენპროკურორობის კანდიდატების შესარჩევად სამოქალაქო საზოგადოების, აკადემიური წრეებისა და სამართლის დარგის სპეციალისტებთან კონსულტაციები საჭირო აღარ იქნება. მას საპროკურორო საბჭოს წევრები დაასახელებენ და დასამტკიცებლად პარლამენტს წარუდგენენ.

გენერალური პროკურორობის კანდიდატის წარდგენის და მისი თანამდებობაზე განწესების წესში ცვლილება ოცნების პარლამენტმა მესამე მოსმენით — 78 ხმით დაამტკიცა.

მიღებული კანონით გენერალური პროკურორობის კანდიდატის დასახელების უფლება ექნება საპროკურორო საბჭოს თითოეულ წევრს, ხოლო საბჭოში გენერალური პროკურორობის კანდიდატის წარდგენასთან დაკავშირებული პროცესი ერთი კვირის ვადაში დასრულდება.

კანონპროექტის ავტორი და ინიციატორი არიან ოცნების პარლამენტის წევრები: არჩილ გორდულაძე, თორნიკე ჭეიშვილი, ალექსანდრე ტაბატაძე, დავით მათიკაშვილი, რატიო იონათამიშვილი, ალუდა ღუდუშაური, თენგიზ შარმანაშვილი, გურამ მაჭარაშვილი და აკაკი ალადაშვილი.