კომუნიკაციების კომისიას შესაძლებლობა ეძლევა სასამართლოს მეშვეობით ბანკებიდან მაუწყებლების შესახებ კონფიდენციალური ინფორმაცია გამოითხოვოს. კანონპროექტი ოცნების პარლამენტმა დაჩქარებული წესით განიხილა და დღევანდელ პლენარულ სხდომაზე 77 ხმით, ერთხმად დაამტკიცა.

საკანონმდებლო პაკეტის ავტორები ოცნების დეპუტატები არიან. ინიციატორები ამბობენ, კანონის მიღებით,"მაუწყებლობის შესახებ"კანონის აღსრულებაზე პასუხისმგებელ ორგანოს კომუნიკაციების ეროვნულ კომისიას რეგულაციების ეფექტიანად აღსრულების შესაძლებლობა მიეცემა.

ოცნების ახალი კანონი მაუწყებლების დაფინანსებასთან დაკავშირებით გარკვეულ აკრძალვებს ადგენს. კერძოდ, აკრძალულია მაუწყებლის დაფინანსება ადმინისტრაციული ორგანოს, პოლიტიკური პარტიის, თანამდებობის პირისა და საჯარო მოსამსახურის მიერ. ასევე, აკრძალულია მაუწყებლის მიერ უცხოური ძალისგან პირდაპირი ან არაპირდაპირი დაფინანსების — ფულადი თანხის ან ქონებრივი ღირებულების სხვა სახის მატერიალური სიკეთის მიღება.

აღნიშნულის აღსრულებას კახა ბექაურის უწყება უზრუნველყოფს.

კანონის პროექტის განმარტებით ბარათში აღნიშნულია, რომ მაუწყებლის დაფინანსების აკრძალვასთან დაკავშირებით არსებული რეგულაციის ეფექტიან აღსრულებას აღმასრულებელი ორგანოსთვის კანონმდებლობით გათვალისწინებული მექანიზმები სათანადოდ ვერ უზრუნველყოფს, ხოლო იმისათვის, რომ მიღწეულ იქნას კანონის მიზანი და მოხდეს მისი აღსრულება, საჭიროა აღსრულების სათანადო მექანიზმების არსებობა.