გალტ & თაგარტმა ერევანში, კაპიტალის ბაზრის მხარდაჭერის (CMS) პროგრამის ფარგლებში, პირველი საგანმანათლებლო კონფერენცია ჩაატარა თემაზე — Capital Markets: Preparation and Approval. კონფერენციაში სომხური კომპანიებისა და ფინანსური სექტორის წარმომადგენლებმა მიიღეს მონაწილეობა.

ღონისძიების მთავარი თემატიკა კაპიტალის ბაზრების როლი ეკონომიკაში, მათი სტრუქტურა და საჯარო ბაზრებზე დაფინანსების მოზიდვის უპირატესობები იყო. კონფერენციაზე ასევე განიხილეს რეგულაციური ჩარჩო, რომელიც სომხეთის კაპიტალის ბაზრის გარემოს განსაზღვრავს და კაპიტალის ბაზრებზე წვდომის მოსამზადებელი პროცესები.

გალტ & თაგარტის საკონსულტაციო მიმართულების ხელმძღვანელმა, თამთა გორგაძემ პანელურ დისკუსიაში მიიღო მონაწილეობა. მან საქართველოს კაპიტალის ბაზრის მხარდაჭერის პროგრამის გამოცდილება გააზიარა, რომელიც გალტ & თაგარტის ჩართულობით წარმატებით განხორციელდა. ასევე, თამთა გორგაძემ ისაუბრა იმ გზაზე, რომელიც ქართულმა კომპანიებმა კაპიტალის ბაზრებზე გასასვლელად გაიარეს — ეს გამოცდილება მნიშვნელოვანია სომხური კომპანიებისთვის, რომლებიც მსგავს პროცესს ახლა იწყებენ.

“მოხარული ვართ, რომ გალტ & თაგარტის გამოცდილება კაპიტალის ბაზრის განვითარებაში უკვე სცდება ქვეყნის ფარგლებს და რეგიონის მასშტაბებზე გადის. ჩვენი მიზანია, ხელი შევუწყოთ კორპორაციული სექტორის ზრდასა და მათი დაფინანსების დივერსიფიცირებას. სომხეთში კაპიტალის ბაზრის განვითარების პროგრამის იმპლემენტაცია მნიშვნელოვანი ნაბიჯია გალტ & თაგარტისთვის და ხაზს უსვამს ჩვენი, როგორც რეგიონული ფინანსური ინსტიტუტის, როლს”, — ამბობს თამთა გორგაძე, გალტ & თაგარტის საკონსულტაციო სამსახურის ხელმძღვანელი.

ინფორმაციისთვის, CMS პროგრამა ევროპის რეკონსტრუქციისა და განვითარების ბანკისა (EBRD) და ევროკავშირის (EU) ერთობლივი ინიციატივაა. პროგრამას სომხეთში გალტ & თაგარტი ახორციელებს, სომხეთის ეკონომიკის სამინისტროს პარტნიორობით.

პროგრამის მიზანია სომხეთში კაპიტალის ბაზრების გაძლიერება და ადგილობრივი კომპანიებისთვის დაფინანსების ხელმისაწვდომობის ზრდა. პროგრამა ორი ძირითადი კომპონენტისგან შედგება: საგანმანათლებლო და საგრანტო. საგანმანათლებლო კომპონენტი მოიცავს ვებინარებსა და კონფერენციებს, რომლებიც მიზნად ისახავს ცნობიერების ამაღლებას და პროფესიული მხარდაჭერის უზრუნველყოფას. გრანტების კომპონენტი კი კომპანიებს კაპიტალის ბაზარზე განთავსების პროცედურების დაფინანსებაში ეხმარება.