საქართველოს უნივერსიტეტის უსაფრთხოების, პოლიტიკისა და ნაციონალიზმის კვლევითი ცენტრის (UGSPN) ორგანიზებით დღეს, Sheraton Grand Metechi Palace-ში მეექვსე ყოველწლიური საერთაშორისო კონფერენცია გაიხსნა, რომლის თემატიკა ევროპის იდეის იდენტობას, მის მომავალს და მასთან დაკავშირებულ გამოწვევებს ეძღვნება. ღონისძიება ტარდება სლოგანით: "ევროპა არის...? ხანგრძლივი სიცოცხლე ახალ ევროპას!".

კონფერენცია საქართველოს უნივერსიტეტის რექტორმა კონსტანტინე თოფურიამ და ევროკავშირის ელჩმა საქართველოში პაველ ჰერჩინსკიმ გახსნეს. ღონისძიებაზე მოწვეული არიან საერთაშორისო დონის decision-maker-ები და ანალიტიკოსები, მათ შორის: ევროპარლამენტის წევრი კრისტოფ ბრეიზა, ფრანკფურტის მშვიდობის კვლევის ინსტიტუტის მკვლევარი საშა ჰახი, Sky News-ის უსაფრთხოების ანალიტიკოსი მაიკლ კლარკი და თურქეთის საერთაშორისო ურთიერთობების საბჭოს პრეზიდენტი მუსტაფა აიდინი.

კონფერენციაზე, რომელიც ხუთ თემატურ პანელს მოიცავს, განხილული იქნება როგორც ტრანსატლანტიკურ კონტექსტში მიმდინარე გეოპოლიტიკური ძვრები, ასევე რეგიონული სპეციფიკები. ძირითადი თემებია:

  • ევროპის თავდაცვითი ავტონომია — უსაფრთხოების კონცეფციების გადაფასება ტრანსატლანტიკური ცვლილებების ფონზე;
  • აღმოსავლეთ ევროპის გაფართოების დილემა — ევროკავშირის სტრატეგიული არჩევანი და გამოწვევები;
  • სამხრეთ კავკასიის ინტეგრაცია — ევროპული გამოცდილების გაზიარების შესაძლებლობები;
  • ავტოკრატიის მომავალი და წინააღმდეგობის ფორმები — სტრატეგიები დემოკრატიული მედეგობისთვის;
  • პოლიტიკური ლიდერობა და პარტიები — ტრადიციული პარტიული მოდელის კრიზისი და მისი ორგანიზაციული მიზეზები.

საქართველოს უნივერსიტეტის საერთაშორისო კონფერენციები ყოველწლიურად აერთიანებს სხვადასხვა ქვეყნის მკვლევრებს, დიპლომატებსა და პოლიტიკის სფეროს პროფესიონალებს. როგორც ყველაზე რეიტინგული კერძო უნივერსიტეტი საქართველოში, UG მტკიცედ უჭერს მხარს განათლების, კვლევისა და თავისუფალი აზრის განვითარებას, რაც მის ძირითად ღირებულებებს — თავისუფლებას, ჰუმანურობასა და სრულყოფილებას ეყრდნობა.

კონფერენცია ხვალ, 13 ივნისს დაიხურება.