საფრანგეთის სენატმა თითქმის ერთსულოვნად დაუჭირა მხარი კანონპროექტს, რომელიც მიზნად ისახავს სწრაფი მოდის სექტორის მიერ გარემოზე უკიდურესად ნეგატიური გავლენის შემცირებას, განსაკუთრებით მიმართული ჩინური ონლაინპლატფორმების —Shein-ისა და Temu-ს — გასაკონტროლებლად.

კანონპროექტი, რომელიც თავდაპირველად ეროვნულმა ასამბლეამ 2024 წელს მიიღო, მიზნად ისახავს შეამციროს ტანსაცმლის მასობრივი წარმოებისა და მოხმარების შედეგად გარემოსთვის მიყენებული ზიანი. კანონის დამტკიცების ფარგლებში საფრანგეთში რეკლამა აეკრძალებათ ულტრა-სწრაფი მოდის მწარმოებელ კომპანიებს, მათ შორის Shein-სა და Temu-ს.

სენატმა ეროვნული ასამბლეის მიერ დამტკიცებულ კანონპროექტებში ცვლილებები შეიტანა. მათ შორის უმთავრესი იყო "ულტრა-სწრაფი" და "კლასიკური" მოდის დეფინიციების შეცვლა, რამაც ევროპულ ბრენდებს, მაგალითად, Zara-ს, შეღავათი მისცა. ამას მწვანე პარტიების მხრიდან კრიტიკა მოჰყვა.

სენატის კომიტეტის თავმჯდომარემ, ჟან-ფრანსუა ლონჟომ განმარტა, რომ კანონპექტში შეტანილი ცვლილებები გათვალისწინებულია მხოლოდ იმ კომპანიებისთვის, რომლებიც უგულებელყოფენ გარემოსა და სოციალურ კრიტერიუმებს, და რომ ეს კანონი არ ეხება ევროპულ ქსელებს.

"Shein არ არის სწრაფი მოდის კომპანია," — ნათქვამია ჩინური კომპანიის საპასუხო განცხადებაში, რომელიც გამოქვეყნდა კენჭისყრის საპასუხოდ გამოქვეყნდა. განცხადებაში ასევე აღნიშნულია, რომ Shein-ის მოდელი არის "ნაწილი გამოსავლისა, და არა პრობლემისა."

ჩინური ონლაინპლატფორმების მიერ შეთავაზებული ძალიან დაბალი ფასის მქონე პროდუქციის მხრიდან კონკურენციის ფონზე, რამდენიმე ფრანგული ბრენდი მნიშვნელოვანი სირთულეების წინაშეა, მათ შორის Jennyfer და NafNaf, რომელთაც გაზაფხულიდან ლიკვიდაციის გამოცხადება მოუწიათ.

კანონი ასევე დააწესებს სანქციებს როგორც სწრაფი, ისე ულტრა-სწრაფი მოდის კომპანიებისთვის იმ შემთხვევაში, თუ ისინი ვერ დააკმაყოფილებენ განსაზღვრულ გარემოსდაცვით კრიტერიუმებს — სანქცია შეიძლება შეადგენდეს თითოეული ტანსაცმლის ნივთზე მინიმუმ 10 ევროს, ან პროდუქტის (გადასახადის გარეშე) ფასის მაქსიმუმ 50%-ს.

მთავრობამ ევროპულ კომისიას კენჭისყრის შედეგები უნდა აცნობოს, შემდეგ კი საჭირო გახდება შერეული კომიტეტის შექმნა, რათა სენატისა და ქვედა პალატის კანონპროექტის ვერსიებს შორის კომპრომისი იქნეს მიღწეული კანონის ამოქმედებამდე.