"ნუ ატყუებთ თქვენს მაყურებელს, არავის დაიჭერენ, ამისთვის არის ადმინისტრაციული ჯარიმა და ჯარიმა მიაჩვევს ყველას, რომ ზრდილობა და კულტურა ჰქონდეს", — ასე გამოეხმაურა ოცნების პარლამენტის ვიცესპიკერი ნინო წილოსანი მისი და ოცნების სხვა წარმომადგენლების მიერ დაწერილ საჩივრებსა და მოქალაქეების სასამართლოში დაბარებებს.

"ნუ ატყუებთ თქვენს მაყურებელს, არავის დაიჭერენ, ამისთვის არავის დაიჭერენ — ამისთვის არის ადმინისტრაციული ჯარიმა,

მგონია, რომ ეს იყო სამაგალითო იმისთვის, რომ სხვისი შეურაცხყოფა, ცილისწამებები, ბრალდებები და მათ შორის, ასეთი ზიზღის კამპანია, რომლისთვისაც ისინი დაფინანსებული არიან, [მიუღებელია]…არავის არ დაიჭერენ - ამისთვის არის ადმინისტრაციული ჯარიმა. ჩემზე წარმოდგენა [სასამართლოში დაბარებულ ადამიანებს] არ უნდა შეეცვალოთ, რა თქმა უნდა, მათ აქვთ უფლება იფიქრონ ისე, როგორც ფიქრობენ, მაგრამ ამ ყველაფერს უნდა ჰქონდეს კორექტული და კრიტიკის ფორმა და არა შეურაცხყოფის… როდესაც ადამიანის შეურაცხყოფას და ზიზღის გენერირებას ახდენ, აუცილებლად უნდა იცოდე რა კანონი მოქმედებს არამხოლოდ საქართველოში, არამედ ევროპის სხვა ქვეყნებშიც," — ნინო განაცხადა წილოსანმა.

შეგახსენებთ, რომ ოცნების დეპუტატების — ნინო წილოსანის, მარიამ ლაშხის, მამუკა მდინარაძის და თეა წულუკიანის სოციალურ ქსელში შეურაცხყოფისთვის 20-მდე პირი დღეს სასამართლოში დაიბარეს.

მათ შორის არიან:

ჟურნალისტები — ვახო სანაია, დეა მამისეიშვილი, ნანუკა ჟორჟოლიანი, ვიკა ბუკია, ეკა მიშველაძე, ტელეკომპანია "ფორმულას" თანადამფუძნებელი მიშა მშვილდაძე;

პოლიტიკოსები — პარტია ფედერალისტების ერთ-ერთი ლიდერი თამარ ჩერგოლეიშვილი, ენმ-ს ლიდერი ლევან ხაბეიშვილი, კოალიცია ცვლილებისთვის ლიდერი ელენე ხოშტარია, კოალიცია ძლიერი საქართველოსთვის ერთ-ერთი ლიდერი ალეკო ელისაშვილი;

აქტივისტები — მარიამ გეგუჩაძე, ანა სუბელიანი, ქეთი მოლაშვილი, გიგა მაქარაშვილი.

ასევე — "ანტისაოკუპაციო მოძრაობის" ლიდერი დავით ქაცარავა, საერთაშორისო ურთიერთობათა სპეციალისტი გიორგი ტუმასიანი, "საფარის" ხელმძღვანელი ბაია პატარაია, ეროვნული ბანკის ყოფილი პრეზიდენტი გიორგი ქადაგიძე.

ყველა მათგანს გუშინ, 11 ივნისის საღამოს დაუკავშირდნენ და დრეს, 12 ივნისს დაიბარეს სასამართლოზე.

პროცესზე არ გამოცხადების გამო ელენე ხოშტარიას და ანა სუბელიანის სასამართლო პროცესები გადაიდო.