თბილისის საქალაქო სასამართლოში, საქართველოს სახელმწიფო-პოლიტიკური თანამდებობის პირის შეურაცხყოფის საქმეზე, ადმინისტრაციულ პასუხისგებაში მიცემული ოთხი პირის: კოალიცია ცვლილებებისთვის ლიდერის, ელენე ხოშტარიას, სამოქალაქო აქტივისტის, ანა სუბელიანის, უფლებადამცველის, ბაია პატარაიას და ანტისაოკუპაციო მოძრაობის ლიდერის დავით ქაცარავას სასამართლო პროცესები გადაიდო.

სასამართლო პროცესზე გამოცხადებაზე სამმა მათგანმა უარი განაცხადა, ხოლო ინტერპრესნიუსის ცნობით, დავით ქაცარავას სასამართლო ვერ დაუკავშირდნენ, შესაბამისად, მას დადგენილება არ ჩაუბარებია, რის გამოც მოსამართლემ სასამართლო პროცესის გადადება გადაწყვიტა.

ცნობისთვის, პოლიტიკოსებსა და აქტივისტებს შინაგან საქმეთა სამინისტრო ადმინისტრაციულ სამართალდარღვევათა კოდექსის 173-16 პრიმა მუხლის დარღვევას ედავება, რომელიც პოლიტიკური თანამდებობის პირის შეურაცხყოფას გულისხმობს. მუხლი სასჯელის სახედ 1500 ლარიდან - 4000 ლარამდე ჯარიმას, ან ადმინისტრაციული პატიმრობას 45 დღემდე ვადით ითვალისწინებს.