აშშ-ს ელჩის საქართველოში, კელი დეგნანის განცხადებით, სანამ ქართველები ოკუპირებულ ტერიტორიებთან მიმართებით კრემლისგან სარწმუნო ქმედებებს არ იხილავენ, მათ შორის, ოკუპირებული ტერიტორიების დატოვებას, მათ განცხადებებს დიდი წონა არა აქვს. ასე ეხმაურება ის რუსეთის საგარეო საქმეთა მინისტრს, სერგეი ლავროვს, რომელმაც თქვა, რომ საქართველოსთან ურთიერთობის აღსადგენად მზად არიან.

"კრემლისგან სხვადასხვა განცხადება გვსმენია, მაგრამ მათ მეტი სანდოობა ექნებოდა, თუ ამას მოჰყვებოდა საქართველოს ოკუპირებული ტერიტორიებიდან გასვლა, აფხაზეთისა და ცხინვალის აღიარების უკან წაღება და იმ ვალდებულებების შესრულება, რომელიც რუსეთმა 2008 წელს იკისრა. მე არცერთი ეს ნაბიჯი არ დამინახავს. ამიტომ, მგონია, რომ სანამ ქართველები არ დაინახავენ უფრო სანდო, კონკრეტულ ნაბიჯებს ოკუპირებულ ტერიტორიებთან მიმართებაში, განცხადებები, რომელსაც კრემლი აჟღერებს, დიდი წონის მატარებელი არ არის", — განაცხადა დეგნანმა.

პირველ სექტემბერს რუსეთის საგარეო საქმეთა მინისტრმა, სერგეი ლავროვმა განაცხადა, საქართველოსთან ურთიერთობის აღსადგენად მზად არიან. როგორც პროსახელისუფლებო მედია RIA წერდა, ოკუპანტი ქვეყნის მინისტრმა აღნიშნა, რომ ნებისმიერ დროს გადადგამენ ამ ნაბიჯს, თუ საქართველოს სურს "მეზობელთან ნორმალურად ცხოვრება".