პოლიტიკური პარტია დროას განცხადებით, ქართულმა ოცნებამ ევროკავშირის დახმარების მეორე ტრანშის შეჩერება "ივარაუდა" და შედეგად ვიწროპარტიული ინტერესები ეროვნულ ინტერესებსა და ევროკავშირში ინტეგრაციის სტრატეგიულ მიზანზე მაღლა დააყენა.

"როგორც შარლ მიშელის შეთანხმებიდან, ისევ ევროკავშირის დახმარების ამ ფორმატიდან გასვლა, რომლის მიზანიც იყო, მეტი დახმარება და ინტეგრაცია მეტი დემოკრატიული განვითარების სანაცვლოდ, ცალსახად გვიჩვენებს, რომ ქართული ოცნება ადგას დემოკრატიისა და საქართველოს ევროპული და ევროატლანტიკური ინტეგრაციის ხარჯზე საკუთარი ძალაუფლების კონსოლიდაციისა და ავტორიტარიზმის გზას", — წერია დროას განცხადებაში.

დროას შეფასებით, ირაკლი ღარიბაშვილის განცხადება და უარი ევროკავშირის დახმარების მიღებაზე ანტიდემოკრატიული და ანტიდასავლური კურსის მკაფიო გამოხატულებაა. მათი განცხადებით, ეს აშკარად წარმოადგენს ერთმნიშვნელოვან უარს სასამართლო სექტორში განსახორციელებელ რეფორმებზე და საქართველოს ევროატლანტიკური კურსიდან გადახვევის ღია დეკლარირებაა.

ამ თემაზე ისაუბრეს სხვა ოპოზიციური პარტიების ლიდერებმაც. ლელოს ლიდერი, მამუკა ხაზარაძე ამბობს, რომ დახმარების მეორე ნაწილის აღებაზე უარის თქმა ქვეყნისა და ხალხის წინაშე უპასუხისმგებლობაა. ენმ-ს დეპუტატი რომან გოცირიძე კი აცხადებს, რომ მთავრობამ წინმსწრებად თქვა უარი ევროკავშირის დახმარებაზე, რათა ის სანქციად არ გამოცხადებულიყო. ევროპული საქართველოს პოლიტსაბჭოს თავმჯდომარის, გიგი წერეთლის განცხადებით კი ის, რომ საქართველო ევროკავშირისგან დახმარებას ვერ მიიღებს გარკვეულწილად სანქციის ფორმაა.

ცნობისთვის, პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროსაფინანსო დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება.

ამასთანავე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".