საკოორდინაციო საბჭოს გადაწყვეტილებით, სასწავლო პროცესი სკოლებში 15 სექტემბრიდან 4 ოქტომბრამდე დისტანციურ რეჟიმში განახლდება.

საბჭოს გადაწყვეტილებით, ანალოგიური რეგულაცია გავრცელდება უმაღლეს და პროფესიულ სასწავლებლებზე. ასევე, 4 ოქტომბრამდე შეზღუდული დარჩება სააღმზრდელო დაწესებულებების მუშაობა და ეს ეხება როგორც სახელმწიფო, ისე კერძო ბაღებს.

"ჩვენ გადავწყვიტეთ, რომ გვექნება დიფერენცირებული მიდგომა, რაც გულისხმობს შემდეგს — იმ ქალაქში, ან სოფელში, სადაც ინფიცირების მაჩვენებელი იქნება 4%-ზე ქვემოთ იქ სწავლა განახლდება საკლასო ოთახებში და აუდიტორიებში, ანუ დასწრებულ ფორმატში. ხოლო იქ, სადაც 4%-ზე მაღალი იქნება მაჩვენებელი, გაგრძელდება დისტანციურ ფორმატში", — განაცხადა განათლების მინისტრმა.

ჩხენკელის თქმით, იმ ქალაქებში, სადაც 4%-ზე დაბალი იქნება ინფიცირების მაჩვენებელი და სწავლა დასწრებულ ფორმატში გაგრძელდება, სურვილის შემთხვევაში მშობლებს ექნებათ საშუალება გადაწყვიტონ, გააგრძელებენ თუ არა მათი შვილები სწავლას ამ ფორმატში.

მისივე განცხადებით, 4 ოქტომბრის შემდეგ სწავლის აუდიტორიებში განახლებასთან დაკავშირებით გადაწყვეტილება ინფიცირების მაჩვენებელზე იქნება დამოკიდებულ.

"ყველა უნივერსიტეტს თავისი დაწყების თარიღი გააჩნია და თავისი აკადემიური გრაფიკით აწარმოებს სასწავლო პროცესს, ყველა იწყებს, როდესაც მათ ეს აქვთ გაცხადებული, მაგრამ 4 ოქტომბრამდე იწყებენ დისტანციურ ფორმატში და 4 ოქტომბერს ვნახავთ სიტუაციას, ჩვენ დეტალურად გამოვიკვლევთ, თუ რა არის იმ დროისთვის ინფიცირების მაჩვენებელი კონკრეტულ ქალაქში და სოფელში, ამაზე იქნება დამოკიდებული გადაწყვეტილება", — თქვა მან.

მინისტრის თქმით, ერთადერთი გამონაკლისი ამ მხრივ მედიცინის ფაკულტეტის სტუდენტების პრაქტიკული, ლაბორატორიული და კლინიკური მეცადინეობები იქნება.

"ერთადერთი გამონაკლისი უნივერსიტეტებში გახლავთ მედიცინის პროგრამის სტუდენტებისთვის პრაქტიკული, ლაბორატორიული და კლინიკური მეცადინეობები. მინდა აღვნიშნო, რომ თეორიული მედიცინისთვისაც მთლიანად იქნება დისტანციურად 4 ოქტომბრამდე, რაც შეეხება მანამდე, უფლებამოსილება ეძლევათ უნივერსიტეტებს, რომ მედიცინის პროგრამის სტუდენტებისთვის კლინიკური, ლაბორატორიული და პრაქტიკული სამუშაოები აწარმოონ დასწრებული ფორმატით, ოღონდ აქაც არის ძალიან მნიშვნელოვანი დათქმა — ამ აქტივობების დროს როგორც სტუდენტები, ასევე, პროფესორ-მასწავლებლები, რომლებიც ამ პროცესს უძღვებიან, უნდა იყვნენ ორჯერადად აცრილები", — განაცხადა ჩხენკელმა.

მინისტრისს განცხადებით, იმ შემთხვევაშიც, თუ კონკრეტული სკოლის მასწავლებლების 100% იქნება აცრილი, სწავლის დასწრებულ ფორმატში განახლებასთან დაკავშირებით მთავარი კრიტერიუმი მაინც იმ ქალაქისა, თუ სოფლის ინფიცირების მაჩვენებელი იქნება.

"ბოლო თვის განმავლობაში მკვეთრი ზრდა არის მასწავლებლების აცრასთან დაკავშირებით, 9%-დან 46%-მდე ერთ თვეში გაიზარდა ეს მაჩვენებელი და ყოველდღიურად იზრდება, მაგრამ აქვე უნდა აღვნიშნო, სკოლაში მასწავლებლების 100% რომ იყოს აცრილი, თუ ის სკოლა მდებარეობს იმ გარემოში, იმ უბანში, იმ ქალაქში, სადაც ინფიცირების მაჩვენებელი მაღალია, ანუ კონკრეტულად 4%-ზე მაღალი, იქ, რასაკვირველია, საშიშროება, რომ ვირუსი შევიდეს, არის კვლავ მაღალი, შესაბამისად 4%-იანი კრიტერიუმი არის, რასაც ჩვენ დავეყრდნობით 4 ოქტომბრის შემდეგ", — ამბობს ჩხენკელი.

UNICEF-ის რეკომენდაციასთან დაკავშირებით დასმულ კითხვას განათლების მინისტრმა უპასუხა, რომ ორგანიზაციის წარმომადგენლობის ხელმძღვანელობასთან ჰქონდა შეხვედრა და ამ მხრივ მთავარი კრიტერიუმი ბავშვების ჯანმრთელობაა.

"შეხვედრა მქონდა დეტალური UNICEF-ის წარმომადგენლობის ხელმძღვანელთან. სპეციფიკა მდგომარეობს იმაში, რომ საქართველოში დღესდღეობით 90% შტამებისა არის დელტა. ამ შტამმა განსაკუთრებით სამიზნეში ამოიღო ბავშვები და ახალგაზრდები. ცხადია, მე პირველი ვარ იმის მომხრე, რომ სასწავლო პროცესი მიმდინარეობდეს ბუნებრივ გარემოში, ანუ საკლასო ოთახებში და აუდიტორიებში, მაგრამ მთავარი — სკოლები არიან მზად ყოველმხრივ და ყველა სცენარისთვის ჩვენი სისტემა არის მზად. აქ კრიტერიუმი არის ბავშვების ბავშვების ჯანმრთელობიდან გამომდინარე, ამიტომ არის ეს 4%-იანი ინფიცირების მაჩვენებელი წყალგამყოფი და ამ კრიტერიუმით ვსარგებლობდით ჩვენ, რაც პანდემია დაიწყო", — ამბობს ის.

გაიგე მეტი:

• რა შეზღუდვები დააწესა საკოორდინაციო საბჭომ